馬賽撲擊疲兵里爾

猪拉多纳

5大聯賽法甲地頭威力最強

5大聯賽之中，法甲主場威力最強（今季主勝比率49.7%），呢個現象某程度上同法國係西歐面積最大嘅國家有關，畢竟長途跋涉會影響球員表現，而法國內陸作客距離最遠嘅，就係馬賽同里爾呢兩個一南一北嘅城市，樂比今日支持馬賽取得聯賽主場9連勝，成為法甲冬季冠軍。

（開賽時間：周日晚9:00）

樂比曾到訪里爾及馬賽兩間球會，兩地無論氣候同文化均可謂南轅北轍；馬賽為地中海氣候、里爾則為大陸氣候，兩軍擁躉風格亦大有不同，馬賽多北非移民、里爾則甚多比利時支持者，由於兩軍各據山頭，故作客一方近年都吃盡苦頭。
里爾多線作戰蝕章

我支持馬賽嘅最重要原因，係因為對手里爾近年不斷削減班費，但又有歐洲賽負擔，根本冇足夠人力應付多線作戰，卒之搞到歐霸包尾出局，聯賽處於下游位置，兩頭唔到岸。最大鑊係里爾上周中喺法聯盃激戰至12碼階段先出局，雖有輪換，但點都扯乾部分球員體力，相比起馬賽唔使踢歐洲賽兼一早喺聯賽盃出局，里爾實在係蝕晒章。

況且，只要馬賽今場贏波的話就可以成為冬季冠軍，難得食到宿敵巴黎聖日耳門，動力唔使懷疑，馬賽喺阿根廷名帥比爾沙領導下，已經成為全法甲鋒力最強嘅球隊，入球率由上季1.39暴升至2球，射手基格納同倒戈嘅皮耶狀態大勇，各項有利條件集一身，樂比認為可以進取啲，捧馬賽讓半一上盤。
森多升呢主W唔怕追

另一場意甲森多利亞主場對烏甸尼斯，睇好主隊。森多今季獲費拉路（Massimo Ferrero）入主後脫胎換骨，聯賽及盃賽加埋僅輸1場，呢位言論出位嘅影視大亨，雖然對足球認識唔深，但勝在極愛面子唔輸得，而且佢同班球員仲Friend過打Band，贏波會衝落場同佢哋攬頭攬頸，班手足當然肯為佢賣命。由於首席射手加比亞甸尼好可能踢埋呢場波後就轉投拿玻里，今仗必加多兩錢肉緊報答老細，馬會將主勝壓低至1.63倍，遠低於市場平均價1.84倍，睇嚟真係好有信心。

（TVB302周日晚10:00直播）
樂比推介

馬賽（上盤）

森多利亞（主勝）