祖記拿玻里大騷娛賓

猪拉多纳

移師多哈 志在吸客

今屆意大利超級盃反傳統安排季中進行，上季意甲冠軍祖雲達斯對意大利盃盟主拿玻里，呢項賽事近年已成為「表演賽」，專登出去海外比賽，無非都係為搵銀。今次遠赴卡塔爾多哈舉行，「掘金」味道更加濃厚。祖、拿二軍肯定識做，夾計做大騷，盡情踢進攻足球娛賓，只要贏得口碑，將來實大把「生意」送上門，邀請佢哋去當地搵銀，推介入球大。

（now633及660周二凌晨1時30分直播）

過去5屆意超盃有3屆喺北京舉行，入場人數動輒7、8萬，比喺意大利國內踢，每場起碼多兩三萬人，門票亦可以賣得貴啲，有助球隊吸金。今次去到2022年世盃主辦國卡塔爾比賽，擺明都係錢作怪，因為呢個中東國家近年大力發展足運，經常出天價戲金邀請知名球隊去當地比賽，估計祖雲達斯同拿玻里未開波已袋咗一大筆，當然要交足貨。

由於意甲球隊號召力唔及英超及西甲勁旅，所以祖、拿二軍應會做齣好戲，省靚意甲招牌，吸引更多球迷支持，令將來有更多「掘金」機會，戲金仲可以叫高啲。吸客最直接方法，就係盡量入波，球迷睇得開心，自然有收視，兩隊應會鬥攻。
泰維斯希古恩鬥射術

事實上，意超盃實際競爭意義低，雙方當表演賽咁踢，亦有利入波。加上今次去中東「過冬」似足度假，球員抱輕鬆心情比賽，亦會踢得較放。雙方鋒線人腳鼎盛，祖記射手泰維斯、拿玻里前鋒希古恩鬥射術，入波唔會少。睇番過去5屆意超盃全部開大，值得再追。