米堡回勇撐客W冇死

猪拉多纳

布力般「快車首站」贏變輸打窒道氣

英超聖誕新年快車固然吸引，不過英冠今晚都有場波有好路數，布力般流浪主場迎戰米杜士堡，布力般喺「快車首站」出師不利，先勝後敗士氣受挫，相反米堡雖然連場不敗走勢斷纜，好在經過教練卡蘭卡當頭棒喝之後，班波即時極速反彈重返勝軌，兩軍近況各走極端，今場梗係揀米堡2.22倍客勝啦！

（TVB301周日晚11:00直播）

米杜士堡前一場聯賽作客淨吞葉士域治兩蛋，8戰4勝4和不敗走勢告終，主帥卡蘭卡賽後嬲到震，鬧爆班球員表現唔掂，踢咗場全季最差嘅比賽。好在經過主帥咁樣省一省，米堡班球員當堂醒神晒，前日喺「快車首站」3:0大勝諾定咸森林極速反彈，安歷基傑基同李爾湯連兩名鋒線主將更被提早收起留力，今晚作客布力般就算失地利都值得秤先。

另邊廂嘅主隊布力般今戰雖然有主場優勢，弊在佢哋近期狀態勁曳，近5場聯賽得1勝1和3負，前日佢哋喺拆禮物日鬥保頓，上半場雖然由祖舒亞京治先拔頭籌，可惜換邊後連失兩球輸1:2收場，咁樣喺「快車首站」贏變輸肯定打窒條氣，對士氣造成唔少打擊，今場面對狀態反彈嘅米堡隨時再輸，2.22倍客W玩得過！