獅吼有起悉開齋係時候

猪拉多纳

衞冕嘅布里斯班獅吼今季出閘脫腳，但經過早前換帥後，球隊表現已有所起色，今仗回師主場面對近期陷入傷兵潮嘅FC悉尼，有望打開今季主場勝利之門，獅吼主場小讓平半，阿謙梗係捧上盤啦！

（有線64及203台周二下午5時直播）

獅吼開季嘅表現認真麻麻，聯賽連盃賽計曾錄得5連敗，搞到主帥梅維爾最終要走人，改由法蘭費臣接手球隊。法蘭費臣領軍後獅吼嘅表現逐漸重回正軌，上仗作客更戲劇性以3比3逼和中岸水手。獅吼今仗雖仍有門將迪奧列托斯、後衞軒基特、史堤芬魯圖及中場布萊治因傷缺陣，而另一中場麥特麥基則要踢國際賽而離隊，但上仗缺陣嘅中場魯克巴坦則有望披甲，實力上有增無減有望打開今季主場勝利之門。
FC悉尼近5仗未威過

FC悉尼近5仗未嘗1勝，上仗更慘吞阿德萊德聯3蛋，球隊明顯正處於頹勢。FC悉尼喺餘下賽季將會缺少4名常規正選，包括中場艾希爾菲及歷克卡利、前鋒哥利加美路和後衞奧尼洛夫斯基，更有中場安東尼斯要出戰國際賽。FC悉尼近期連場輸波，反映球隊完全未適應喺多名主力缺陣下嘅情況，今仗作客相信都係凶多吉少，就算受讓都咪掂。