勝利光輝演榜首大戰

猪拉多纳

澳職上演榜首大戰，「老二」墨爾本勝利喺中立場迎戰「一哥」珀斯光輝。勝利早前雖喺打吡戰被墨爾本城打破今季不敗身，但球隊其後迅速反彈，今仗勢必踢得進取。至於光輝為求進一步鞏固榜首位置，唔會踢得保守，阿謙睇好今仗入波唔會少，捧大盤！

（有線64及203台周五下午4時40分直播）

由於要遷就1月9日開打嘅亞洲盃，澳職近期大開快車，勝利喺打吡戰輸波後，上仗擊敗噴射機成功反彈。勝利今仗有突尼西亞前鋒賓卡法拿停賽，中場米利根亦要代表澳洲出戰亞洲盃離隊，仲有中場馬夏斯、一對後衞丹尼爾佐治夫斯基及迪比亞因傷倦勤，中後場唔齊人之下倒不如放膽鬥攻。
光輝為保優勢作客照砌

光輝上輪聯賽喺「拆禮物日」踢，比勝利多1日休息時間，但近期客場表現麻麻，對上兩仗只係1和1負未贏過，今仗中立場出戰要贏波唔係易事。但光輝陣中只有靴斯及尼高斯兩名長期傷兵，未有任何球員被徵召出戰國際賽，前線主將如安迪基奧治、夏朗特及李察加西亞近期賽事都有入波，為鞏固榜首優勢，今仗相信都會踢得進取，1.77倍大盤值捧。