燦美爾+1食天鵝

猪拉多纳

第3圈易爆冷 坐鎮西北有着數

昨早收到謝拉特將離開利物浦嘅消息，科娜個心即刻沉咗一沉，既然「神奇隊長」唔能夠留効紅軍直至掛靴，我惟有希望佢會好似「天鵝」史雲斯領隊蒙克咁，會喺未來由傳奇球員成為主帥，重返紅軍再上高峰！蒙克今季雖然帶領史雲斯取得唔錯嘅成績，不過隊波啱啱先喺周四晚踢完聯賽，今晚就要喺英足盃第3圈作客英乙嘅燦美爾，未必能夠全力出擊，一於捧受讓嘅燦美爾！

（now 621、635及668周六晚11時直播）
史雲斯體力輸蝕

35歲嘅蒙克雖然唔係史雲斯青訓出身，但大大話話都効力咗「天鵝」成10年，備受球迷同球員嘅尊敬，上年2月臨危受命頂替被炒嘅米高盧特立，以球員兼領隊身份帶領史雲斯成功護級，今季仲成功坐正，幫史雲斯喺聯賽榜排緊第9位，成績不俗。

之不過咁，天鵝今季攞到咁嘅成績，主要係靠主場威力，作客表現麻麻，近10場作客只係贏得1場。而且「天鵝」元旦日先作客完昆士柏流浪，體力已經打折扣，加上今場仲要遠征身處「大西北」嘅燦美爾，冰天雪地下更加攞命，史雲斯今場難言穩勝。

足總盃一向係爆冷溫床，以上年為例，億萬大軍曼城就試過喺第3圈作客英冠嘅布力般流浪打和1比1、英甲嘅錫菲聯亦擊敗阿士東維拉晉級、而韋斯咸更畀英冠諾定咸森林大炒5蛋，所以邊個話英乙嘅燦美爾唔可以越級挑戰成功？燦美爾近五仗主場不敗，讓球主勝值得一博！