馬體會-2 照炒利雲特

猪拉多纳

費托回歸「文仔」唔敢揸流攤

「王子」效應激勵「文仔」！經過短暫歇冬後，西甲今晚重燃戰火，先由衞冕嘅馬體會主場對住利雲特，雖然剛重返「床單兵團」嘅費蘭度托利斯廢晒武功，但「王子」個朵始終太響，主帥施蒙尼利用佢所產生嘅鯰魚效應，刺激「文仔」文迪蘇傑、基沙文等前鋒搏甩髀爭士哥，整定造訪嘅利雲特冇運行，就算要讓兩球照撐馬體會讓球主勝。

（now 632周六晚11時直播）

費蘭度托利斯周二向馬體會報到，幾十名球迷喺機場接機，足證「王子」依然受馬體會球迷歡迎，不過佢喺重返母會嘅首課操練，五度用頭槌頂向細小嘅空龍，竟然只有一球命中，狀態認真麻麻，被嘲為「廢托」絕非浪得虛名。
基沙文着火趁機數胡

老實講，教頭施蒙尼冇理由唔知費托有幾廢，但正正係睇中呢位「床單兵團」青訓產品兼前隊長嘅地位同影響力，製造鯰魚效應，藉此激勵文迪蘇傑、基沙文等前鋒更加搏命。

尤其係「文仔」文迪蘇傑，呢位克羅地亞前鋒今季改投馬體會，就係一心想證明自己身價，令放棄佢嘅拜仁揼心；但佢歇冬前聯賽只入六球咁大把，實在令人有啲失望，依家馬體會搵個咁廢嘅「王子」取代佢，簡直係奇恥大辱。

文迪蘇傑今仗坐完波監可復出，趁住費托因未完成轉會手續未落得場，勢必入多幾粒騷哥利，另一鋒將基沙文喺歇冬前大勝畢爾包之役連中三元，狀態托弗，遇上近六仗未贏過，兼有主力大衞拿華路停賽及赫達洛達斯受傷嘅下游分子利雲特，佢仲唔拍住「文仔」趁機數胡咩？就算讓球主客和讓到兩球都冇有怕，直取馬體會讓球主勝。