馬體會搶韁 喪炒利雲特

猪拉多纳

費托回巢文迪蘇傑要爭氣

2015年殺到，「張峰」祝大家新年快樂，事事順利！今晚西甲歇冬後重開，馬德里體育會主場迎戰利雲特。擾攘多時，「王子」費蘭度托里斯終於以借用身份回歸馬體會喇！「張峰」都希望佢可以搵到第二春，不過文迪蘇傑就未必咁諗，因為傳聞佢會被賣走，為咗本身前途，相信文迪蘇傑今晚復出會搏盡入波，讓到2球都捧2.4倍「讓球主勝」。

（now632台周六晚11:00直播）

費托周二向母會報到，幾十名球迷到機場接機，足證「王子」喺馬體會球迷心目中嘅地位。費托亦好識做，即晚到球場自行練習，難怪有消息話文迪蘇傑地位不保，可能被賣到曼城，今場佢坐完波監復出，當然要入波證明自己嘅身價，就算費托因為未完成轉會手續，未踢得都唔怕。
王子受歡迎 傳文迪蘇傑賣曼城

馬體會歇冬前作客畢爾包大勝4:1，終止3場不勝，中場基沙文該仗表現活躍，仲大演帽子戲法添！再者，馬體會戰罷今仗，就會進入魔鬼賽程，接連4仗迎戰皇馬同巴塞，假如今仗有閃失，士氣必大受影響。相反，今晚贏得好好睇睇，對5日後開始嘅魔鬼賽程絕對有正面幫助。
利雲特6仗不勝 遇強例被炒

作客嘅利雲特近6仗都贏唔到，近況平平。仲要早前聯賽對皇馬同巴塞，都以0:5落敗，明顯唔同級數，今晚作客上季西甲冠軍馬體會，隨時連還擊之力都無，唔值得冷敲。
Data King：馬體會主場失波少

‧馬體會過去9次西甲主場鬥利雲特取得8勝1和。

‧馬體會近27次主場出戰只失17球，平均每場失0.63球。

‧利雲特最近3場聯賽全和，但佢哋喺西甲史上從未試過4連和。
乜都玩錦囊：利雲特由頭輸到尾博「半主」

利雲特過去造訪卡達朗球場都冇好結果，9場西甲冇贏過不特止，其中8場更輸波而回，今場睇怕都難逃劫數。而且連同西盃及西甲在內，佢哋近5場作客有4場都由頭輸到落尾，今場不妨熱食埋馬體會1.47倍「半主」。
盤路解碼：馬體會今季8次主場出戰西甲，開出7次「半勝」及1次「半和」。