廠仔喪攻補鑊 侯城大難臨頭

猪拉多纳

防線蝦碌畀Fans鬧爆

英格蘭足總盃爆發上屆決賽翻版戰，阿仙奴喺主場對侯城，追入球大最實際。近排兵工廠「防線天團」輪流蝦碌，領隊雲格更加被衝落場嘅球迷當面「單挑」喪鬧，咁失威，相信會趁侯城傷兵問題加劇，落柯打整場入球騷嚟氹番班「槍迷」嘅！

（now621、633及660台周一凌晨1:30直播）

阿仙奴日前喺聯賽作客以0:2不敵修咸頓，落後對方3分，爭入前4名形勢唔樂觀，而且「防線天團」又有「新作」，除咗連環蝦碌搞到險象環生，下半場哥斯尼同施捷斯尼更加搞出個超級大笑話，送大禮畀杜辛泰迪治射入，慘被敵對球迷瘋狂恥笑。
蒙利爾 奧斯賓拿 取代「送禮孖寶」

雖然「送禮孖寶」哥斯尼同施捷斯尼嘅位置，據講會被蒙利爾同奧斯賓拿取代，但「兵工廠」後防冇晒信心，的確係不爭嘅事實，好難相信佢哋可以保持清白身。仲有呀，阿仙奴對修咸頓期間，有個球迷衝落球場兜口兜面鬧雲格，疑似不滿佢嘅領軍表現狂發爛渣，只不過係「教授」死口話呢個係修咸頓粉絲，搵鬼信咩？

係，雖然有消息指阿仙奴會收起阿歷斯山齊士，基奧特停賽，韋碧克又話要養傷，但家陣雲格瘀到上心口，照道理點都會吩咐其他球員踩行油入波，咪忘記後備殺手祖爾甘保質素唔曳，世界盃期間有辦你睇啦，加上「兵工廠」連續14次對賽有波入，期間有12次開入球大，咁好路，冇理由唔追囉！
上屆決賽翻版 侯城兩大守將打柴

上屆決賽侯城踢到加時先以2:3飲恨，但佢哋喺比賽初段曾經領先兩球，今次再碰頭，心態上肯定唔會驚班「廠仔」，最重要係佢哋件王牌射手謝拉域狀態唔曳，近3戰2場有士哥，靠得住吖！不過大家要留意一點，就係侯城兩大守將侯度史東同羅仙尼亞傷咗，防線同阿仙奴一樣咁曳，都係熱捧1.54倍入球大最明智。
乜都玩錦囊：撐埋廠仔1.7倍半W

阿仙奴條防線的確係堅渣，而且兵工廠喺上屆決賽一度以0:2落後侯城，飽食驚風散至能夠喺加時反勝3:2捧盃，睇怕今次會盡可能先開紀錄。睇埋對賽，阿仙奴通常都係先開紀錄嘅一隊，除咗入球大，「兵工廠」1.7倍半勝都值得吼實。
Data King：兩軍對賽廠仔例有士哥

‧舊年3次對賽全部開入球大。

‧阿仙奴近4次交手，有3鋪先開紀錄，場場有波入。

‧阿仙奴近7次主場出擊保持清白身。

‧侯城近11場作客得1場勝仗，其餘4和6負。
盤路解碼：阿仙奴近7戰6開入球大。

英格蘭足總盃賽制

今輪為第3圈，法定時間內打和將擇日重賽。