澳洲夠料炒起科威特

猪拉多纳

首任東道主誓響頭炮

第16屆亞洲盃今日開鑼！十六支參賽隊伍首度會師澳洲，共分四組進行小組賽，每組頭兩名打入八強淘汰賽，全部32場比賽歷時23天，決賽於本月31日舉行。揭幕戰A組獨腳戲，東道主澳洲於可容三萬球迷嘅首都墨爾本矩形球場迎戰科威特，加入亞洲足協後首度主辦亞洲盃，澳洲對今屆賽事空前緊張，領隊普斯迪高路背負沉重壓力，又不幸抽到實力最強嘅死亡之組，同組南韓同阿曼實力都唔簡單，首仗面對同組實力最弱、準備最差嘅科威特，相信會盡情數胡，推介讓球主勝。

（now 672周五下午5時直播）

自2006年加入亞洲足協後，今次係澳洲第三度參加亞洲盃，07年首度參賽打入八強，上屆殺入決賽加時僅敗，今次以東道主身份出師，當然以冠軍為目標，事實上澳洲今夏喺世界盃分組賽雖然全敗，但對荷蘭一役已顯示唔係冇得打，返到嚟亞洲比賽級數立即變番數一數二勁旅。効力紐約紅牛嘅35歲前鋒卡希爾老而彌堅，仍然係球隊領袖同取分之匙，澳洲仲有13位猛將外流歐洲，當中兩名喺德國搵食嘅鋒將羅比古斯同馬菲歷基愈戰愈勇，成為卡希爾最得力嘅左右手，今午主場撲擊弱旅，數胡當然冇手軟！

澳洲領隊普斯迪高路自13年底上任至今，12場比賽只贏過哥斯達黎加同沙特阿拉伯，世界盃輸晒畀智利、荷蘭同西班牙，近期熱身賽亦只能賽和阿聯酋，跟住輸畀卡塔爾同日本，成績嚴格嚟講唔合格，不過一來對手普遍強，二來佢哋本身演出亦不乏亮點，佢為過去粗枝大葉嘅澳洲隊帶嚟多元化踢法，着重短傳同兩翼衞助攻，加上大膽起用新人，除咗前線喺德國搵食孖寶外，門將馬菲賴恩、後衞沙尼貝利呢啲小將演出都好搶眼。正因為咁，澳洲足總對普斯迪高路投以信任一票，相信佢有能力帶領球隊喺主場首奪亞洲盃。
科威特射手失護照嚟唔到

科威特正處於該國足球歷史嘅其中一個最低潮，去年十一月海灣盃遭逢近十多年來最大失敗，喺0比5災難性敗於阿曼後匆匆換帥，由年紀唔輕但資歷甚淺嘅突尼西亞人馬亞路爾接手爛攤子，但短時間內好難解決球隊諸多問題，加上主力射手，喺海灣盃表現出色，被譽為當世其中一位最快前鋒艾安尼斯，因為護照被偷而未能入境，球隊組織力又差，中場企位同四名守將相距太遠，又欠缺有分量防守中場，令防線經常被孤立，面對志在必得嘅東道主凶多吉少。
亞洲盃

賽制：分組賽階段：16支球隊分4組角逐，每組4隊採單循環制，勝得3分，和各得1分，負0分，積分最高頭兩名出線。如同分則順序以下列準則定排名：1.有關隊伍的對賽得分 2.有關隊伍的總球差 3.有關隊伍的總入球數字 4.分組賽總球差 5.分組賽總入球數字 6.互射12碼（若同分球隊出現在同一場比賽完結後） 7.公平競技得分（今屆賽事黃、紅牌計算） 8.抽籤

淘汰賽階段：一場過決勝，法定時間內打和，將加時30分鐘，再和則以互射12碼決勝。