澳洲爭首名更肉緊

猪拉多纳

亞洲盃分組賽今日起踢到最後一輪，Ａ組兩場比賽同時舉行，已經攜手出線嘅東道主澳洲同南韓爭首名較受注目，澳洲得失球差全面佔優，南韓要爭首名就非勝不可，不過睇德國籍領隊史泰歷克嘅準備工作，似乎已經將注意力放喺嚟緊嘅淘汰賽，對於呢場名次之爭，點都唔夠東道主咁肉緊，澳洲小讓平半撐上盤。

（now 671周六下午5時直播）

兩軍都以兩戰全勝成績穩奪八強資格，但以過去兩仗演出比較，有主場之利嘅澳洲明顯高出一皮，兩戰都輕鬆大勝，相反南韓連煲兩餐魚生粥，當中對科威特仲極度受壓，贏得驚險。南韓領隊史泰歷克賽前雖然話假如能夠擊敗東道主，球員信心將會大為提升，不過佢認為半準決賽無論對中國、沙特阿拉伯定烏茲別克，對南韓嚟講都分別唔大。球隊目前仍然受到傷病問題困擾，上仗缺陣嘅三名主力具滋哲、孫興民同金昌洙雖然已經喺休息五日後復操，但史泰歷克講明唔會冒險派冇百分百狀態球員上陣，等佢哋有更多時間準備淘汰賽，今日戰意唔算特別強，相反澳洲喺主場球迷助威下，爭勝決心點都高好多。
科威特受讓「大」報復

同時上演嘅仲有同組嘅阿曼對科威特（now 672周六下午5時直播），兩軍都已出局，今仗只係為名譽而戰，以兩軍過去兩仗表現比較，科威特踢得更有活力，上仗對南韓輸得唔抵，而且喺篤定出局後都冇放軟手腳，積極準備呢場告別戰！梗係啦，兩軍都係海灣地區嘅敵對國家，何況雙方喺不足兩個月前嘅海灣盃碰過頭，科威特曾經恥辱性咁慘吞五蛋，如今換帥後球隊喺紀律同組織方面都大有改善，向阿曼復仇決心鮮明。科威特受讓平半值得捧場，基於雙方都會放開懷抱駁火，入球大有2.15倍亦可兼投。