赤畿用銀彈 炮轟剛果

猪拉多纳

非國盃今晚喺赤道畿內亞（下稱赤畿）揭幕，呢項賽事原本喺摩洛哥舉行，但由於伊波拉病毒肆虐，非洲足協去年11月決定改由赤畿接辦，意味呢項大賽規模全面縮水，因為赤畿只屬小國，配套設施唔足夠，最細個球場容量只得5000人，不過唔好以為赤畿冇料到，皆因佢哋有大水喉射住，銀彈攻勢可打響頭炮，揭幕戰對剛果讓平半，捧2.02倍上盤。

（廣東體育周日凌晨0:00直播）

今次係赤畿第2次亮相決賽周，對上一次係2002年，亦係主辦國身份，結果喺揭幕戰以1:0擊敗利比亞，單係呢場波球員就分到100萬美元獎金，而赤畿該屆最終打入8強創下佳績。
熱身賽都開4500萬獎金

點解赤畿咁有米？皆因佢哋有大量石油，但大部分資源都被獨裁者總統恩圭馬控制住，而該國貧富懸殊情況極為嚴重，人權狀況亦受到西方國家關注，所以足球往往成為該國政權維穩方法之一，出名洗腳唔抹腳嘅總統之子小恩圭馬，之前對西班牙嘅熱身賽就曾開出500萬歐元（約4,500萬港元）天價獎金，雖然今屆非國盃嘅獎金數字低調處理，但肯定唔會少！

雖然赤畿整體實力唔算強，外圍賽亦因派違規球員上陣而被取消資格，後再因主辦國身份踢決賽周，但從另一個角度睇，如果一個國家冇心爭好成績，就唔會千辛萬苦冒住被取消資格之險不斷搵球員入籍，加強國家隊實力，所以絕對係誠意搭夠。而大軍名單中共有16名外流球員，大部分喺西班牙低組別聯賽搵食，最具名氣係前西班牙U21國腳、現効力米杜士堡嘅中場尼素爾，不過香港球迷最熟悉一定係標準流浪中場艾雲。
近8屆東道主揭幕戰不敗

至於對手剛果，可以話係決賽周「最易食」一隊，部分球員喺法國搵食，但都屬名不經傳球員，如果赤畿今場都贏唔到，之後兩場都唔使寄予厚望，過去8屆非國盃主辦國喺揭幕戰都未輸過，今場小讓平半絕對值博。
樂比推介：赤道畿內亞（上盤）