傻豹雌狼「大」打出手

猪拉多纳

射手鬥法有前冇後

玩過鬥獸棋都知豹大過狼，豹食狼可謂冇難度，之不過嚟到意甲就好難講。「傻豹」巴勒莫今晚雖然喺自己地頭迎戰「雌狼」羅馬，之不過後者喺「狼王」托迪帶領之下，誓要重奪聯賽冠軍，一場龍爭虎鬥在所難免，1.95倍入球大諗得過。

（TVB301周日凌晨3:45直播）

雖然意甲榜首仲係畀祖雲達斯霸住，但佢哋明顯冇以前干地領軍時咁Sharp。只要羅馬今晚贏波即追至同分，可以畀壓力遲1日先出戰嘅「斑馬兵」。「雌狼」最近着手搵新兵挑戰意甲，打算借用車路士翼鋒穆罕默德沙拿加強火力，會長柏路達亦表明唔會放走主將比真歷，擺明要錦標唔要錢，就算今場中場尼恩高蘭、迪羅斯停賽，但由拿積同史杜特文頂上，火力依然可觀。

主隊巴勒莫上場作客3:4輸畀費倫天拿9場不敗斷纜，今仗重返獸穴實想贏波出氣。
保羅戴巴拿證身價

「傻豹」今季打起咗件「生牯仔」前鋒保羅戴巴拿，目前佢喺聯賽入咗9球係「傻豹」首席射手，會長沙帕里尼前排接受電台訪問時，暗示曼聯等豪門有意搶人。難得有機會「升呢」，保羅戴巴拿今晚肯定搏盡證身價啦！