國足食住個勢撲擊北韓

猪拉多纳

十年未威過 為排名而戰

亞洲盃B組最後一輪今午上演，兩戰全勝已篤定首名出線嘅中國出戰已出局嘅北韓，中國今次喺被睇淡情況下提早突圍，一眾小將仲未收夠籌，相反北韓今屆賽事準備不足，連過去強項體能優勢都冇埋，好難阻擋國足連勝強勢，追捧1.7倍中國主勝。

（now 671周日下午5時直播）

中國足球喺國際賽同亞洲賽沉寂多年，對上一次交出成績已係04年藉主辦亞洲盃之利攞到亞軍，此後超過十年喺大賽都係早早失敗而回，今屆賽前亦被睇淡，不過憑藉運氣加努力，抽到最弱嘅一組，同組三隊烏茲別克、沙特阿拉伯同北韓近年都在下滑之中，中國新一代小將喺今屆賽事終於爆發，上仗反勝烏茲別克，表現充滿說服力，除咗有兩個靚入波，反先後仲大有機會擴大比數，提早出線後，屈咗多年嘅國足仍處亢奮狀態，表明除咗為亞洲盃，亦要為提升世界排名，準備2018世界盃外圍賽而努力，大家都對目前96位嘅世界排名難以接受，想提升排名，今仗面對第150位嘅對手唔可以有閃失。

中國會作出輪換，除咗累積兩面黃牌嘅任航停賽外，有黃牌在身嘅老將鄭智預期都會休息，不過對手北韓都有大將李榮直停賽，佢哋首戰對烏茲別克尾段有幾名主力踢到抽筋，上仗對沙特下半場更加散晒，面對意猶未盡嘅國足好難轉弱為強。
烏茲沙特出線都冇前途

同組仲有烏茲別克對沙特阿拉伯（now 672周日下午5時直播），爭奪次名出線，但兩軍近期都相當反覆，沙特上仗反勝北韓較為搶鏡，對賽往績亦佔優，今仗和波都掂，預期出線機會稍高，不過兩軍都唔係值得信賴嘅球隊，無論邊隊出線，半準決賽預期都唔夠南韓砌，既然同時開波，不如專注中國場波好過。