阿古路 奧斯爾鬥波鬥喪

猪拉多纳

寄生獸入侵！勁、癲！

日本漫畫《寄生獸》講平凡高中生被外星生物入侵，擁有超越人類嘅體能同感官，但副作用係性情大變！阿仙奴球星奧斯爾同樣受「寄生獸」入侵，助攻力超強，但經常做出匪夷所思嘅行為！今晚阿仙奴作客曼城，奧斯爾遇到同樣有異能力嘅阿古路，英超《寄生獸》大戰，今晚上畫！

奧斯爾2006年喺史浩克04出道，感覺同平凡高中生冇分別，不過後來佢轉會雲達不來梅，開始被「寄生獸入侵」能力爆升，助攻力勁到冇朋友，2010年轉投皇馬，連出名要求高嘅C朗都對佢有讚無彈，幾乎每場都交到靚助攻，但喺佢爆Seed嘅同時，呢個土耳其裔德國仔嘅性情亦開始大變。
大眼仔演偷食鬧劇 阿古路拋妻棄子

自從被大眼外星生物入侵，奧斯爾雙眼愈嚟愈凸，經常失控，除咗先後兩次搭上有夫之婦上演鬧劇，又拖欠老竇嘅經理人佣金被告上法庭，仲試過喺「兵工廠」慘敗畀車路士後，當住廠迷面前深情擁抱車仔領隊莫連奴，睇到人眼都凸埋。雖然奧斯爾上星期對史篤城以後備身份復出，風頭被梅開二度嘅阿歷斯山齊士搶晒，不過阿仙奴領隊雲格預言，奧斯爾只需要3個星期，就可以重現寄生獸能力，奧斯爾仲癲到講出正常人唔敢講嘅說話：「我哋冇理由放棄爭冠軍，足球世界幾時都需要自信。」

有自信係好事，不過沉迷神話好易變成自我安慰。另一位懷疑有「寄生能力」嘅阿古路，雖然冇奧斯爾咁自大，但佢一樣經常失去理智，除咗拋妻棄子，仲夠薑到同阿根廷教父兼岳丈大人馬納當拿鬥插，球場上佢每次受傷後好番，都可以滿血回歸，再生能力驚人，今季英超上陣16戰有14個入球，今晚佢遇上「同類」奧斯爾，肯定好睇過戲。