加納唔齊腳難擒雄獅

猪拉多纳

加納喺舊年夏天經歷「世盃之亂」後，雖然成功躋身非洲國家盃決賽周，不過新帥格蘭接手只得個半月，根本唔夠時間摸清班波，今晚非國盃C組首戰硬撼塞內加爾，即使往績佔優都信唔過，一於撐受讓平半嘅塞內加爾下盤！

（廣東體育周二凌晨0:00直播）
新帥格蘭唔熟班底

「黑星」加納今次點兵，除咗蒙達利同奇雲保定繼續被內部禁賽，仲未由雪櫃攞番出嚟，艾辛同卡華禾艾沙姆兩名中場悍將，亦由於狀態同傷患問題落選，即使中前場仍然有隊長基恩同埋「加納美斯」基斯甸艾素孭飛，但戰鬥力難免打個折扣。

再者，新帥格蘭3年前離開柏迪遜後再冇教波，最近嗰份工係喺泰國球會特羅薩薩納做技術總監，今次佢接掌加納帥印只得6星期時間，講真對隊波了解極都有限，就連足總嗰邊都話要求格蘭今屆捧盃根本唔公平，換句話講，即係唔睇好格蘭做到嘢囉。
塞內加爾多英超兵

另邊廂，塞內加爾箭頭迪亞法沙高受傷落選，名氣頗大嘅丹巴巴亞亦意外冇被徵召，但鋒線仲有柏比斯施斯、馬美迪奧夫同沙迪奧文尼等英超兵擔大旗，論火力唔差得過加納。雖然呢支「特蘭加雄獅」過去7次同加納交手都冇贏過，僅得4和3負，不過趁住「黑星」人腳不整，教頭又未摸熟班波，今場就算打破唔到不勝命運，但要有分落袋唔係難事！

非國盃C組