伊朗佔「地利」1.85Ｗ好「酋」水

猪拉多纳

爭首名8強避日本、順手避埋澳洲，就係今日亞洲盃C組壓軸戰伊朗對阿聯酋嘅焦點。表面睇，阿聯酋和都搞掂，但伊朗今次係「主場」出擊，1.85倍主W點都抵博啲。

（now671台周一下午5:00直播）

點解話伊朗係主隊？除咗足智彩列咗佢哋做主，最關鍵係連澳洲傳媒都發現，伊朗响過去兩場波，看台上面居然見到大批Fans，拎住現時同以前嘅伊朗國旗，仲有一支有獅子、太陽，象徵住波斯嘅旗幟打氣，人數有成2萬人。呢班唔同政見嘅伊朗球迷，能夠放低成見，同心協力幫國家隊助威，你話係咪有「主場」之利嘞？
走線避日本誓挫阿聯酋

除咗人和，伊朗無論喺往績、實力都响亞洲屬一流之選，踢緊俄超魯賓卡山嘅前鋒阿斯蒙，公認係繼阿里戴伊之後，伊朗首屈一指嘅鋒將；中場尼古納姆、索查一個係現役西乙奧沙辛拿球員，另一個就係前度；翼鋒迪查加亦係中東頂級側擊能手；龍門夏基治都喺葡超彭拿費爾搵食，全隊平均質素高過阿聯酋。而且呢班波由舊年世盃決賽周起，除咗對住超強對手，面對亞洲隊伍從未失過波兼全勝，勁到爆。

阿聯酋响今屆發揮唔錯，鋒線表現標青，穆巴奧特更加係阿拉伯10號仔嘅典範，佢拍檔奧馬鴨都拉文仲被認為係可以响歐洲生存嘅中場，問題係佢無心於此，事關踢阿拉伯職聯都有成10萬美金一個禮拜，做乜咁辛苦飄洋過海呢？不過歎得滯就削弱咗班人鬥心，令阿聯酋不擅打硬仗。況且佢哋條防線除咗艾卡馬利有16頂喼帽，其他人都屬經驗淺同水準唔穩定，遇着贏先可以避開D組首名日本嘅伊朗，頂到半場已經好叻，所以呢場主W必博。

亞洲盃C組