謝拉特擔正狙擊車仔

猪拉多纳

紅軍6戰5勝士氣返晒嚟

近排狀態最弗嘅英超球隊，唔係車路士，唔係曼城，反而係連前四都冇嘅利物浦，「紅軍」近6場竟然贏咗5場咁多，周三凌晨佢哋會轉戰英聯盃4強首回合，喺主場大戰車仔，雖然車仔近排都好弗，不過科娜相信有「神奇隊長」謝拉特復出嘅「紅軍」會大打爭氣波，今場受讓值得一博。

（TVB 301周三凌晨3時45分直播）
古天奴馬高域打出信心

利物浦終於一洗季初頹風，近排喺聯賽頻頻攞分，見到紅軍咁多位師兄弟返晒嚟，史達寧返完鄉下牙買加叉足晒電；「魔術師」菲臘比古天奴魔法再現，表現成熟；「瀟灑哥」拿沙馬高域成功搣甩水貨標籤，踢法聰明，連波連尼同列基林拔上場都破入球荒，不過最重要都係兩大主力謝拉特、拉爾拉拿今場有望傷愈復出，令球隊兵源調配更靈活。紅軍重上勝軌，依家球隊士氣高昂，今場唔係冇爆冷嘅可能，有辦你睇，熱刺都贏到車仔5比3啦，世事冇絕對呀！

再加上謝拉特喺宣布離隊後明言要為利物浦爭盃，最有機會就係呢個英聯盃，「神奇隊長」肯定會搏晒老命踢呢場，將「跣腳」一事拋諸腦後。今場係利物浦主場，球隊上下都深明佢哋要把握呢個地利優勢搞掂車仔，否則下回合返去車仔地頭就凶多吉少。
莫帥慣性留前鬥後

從另一個角度睇，以莫連奴一貫嘅作風，車仔反而會留力到次回合，返到自己地頭先KO紅軍，皆因賽程太過頻密，莫帥上場聯賽大炒史雲斯一仗派晒所有主力上陣，為免踢殘佢哋，今場或會派出部分副選迎戰，始終英超冠軍甚至歐聯先係車仔嘅頭號目標，英聯盃呢啲盃仔係bonus，今場只要不敗，去到次回合先搞掂對手都唔遲吖，一於捧受讓嘅紅軍喇！