科特迪瓦細盤有畿

猪拉多纳

今晚非國盃分組賽輪到D組登場，星味十足嘅科特迪瓦迎戰畿內亞，科軍擁有剛加盟曼城嘅韋菲特邦尼、托尼兄弟同迪奧迪等英超兵。但非洲球員忠誠有限，星級猛將更加錫身，耶耶托尼未踢已話有傷，擺明唔想玩，預料科特迪瓦小勝收場，揀入球細。

（周三凌晨零時開賽）

杜奧巴退出科特迪瓦國家隊後，球隊凝聚力令人質疑。新隊長耶耶托尼有傷，今仗可能缺陣，進攻上靠謝雲奴孭飛，恐怕信唔過。至於畿內亞球員大部分喺法國同比利時搵食，名氣冇乜但質素唔曳，即使輸波亦未必會大敗。
喀麥隆冇星 寧捧馬里

同組另一仗馬里對喀麥隆，喀麥隆近年飽受假波同紀律等問題困擾，伊度奧等名將紛紛退隊，今次陣容質素相當平庸兼冇經驗。至於馬里起碼仲有老將施度基達支撐大局，論經驗佔優可秤先。

（周三凌晨3時開賽）