日本半力打巢約旦

猪拉多纳

級數超晒班 輪換冇問題

亞洲盃最後一日分組賽今午由Ｄ組擔綱，重頭戲奪標熱門日本鬥約旦，日本今仗和波即可確保首名出線，不過球隊今屆目標除咗奪冠外，仲要安慰喺世盃傷透心嘅球迷，今仗會繼續以贏波同爭取好表現為目標，面對實力平庸但非勝不可嘅約旦，相信會把握到唔少反擊機會，基於兩軍實力差距大，推介1.82倍日本讓球主勝。

（now 671周二下午5時直播）
副選博表現誓盡數

日本喺分組賽兩戰兩勝，墨西哥籍領隊艾古爾嘅433攻擊陣式已顯示威力更勝往昔，上仗對伊拉克雖只小勝一球，但入球機會真係好多，淨係本田圭佑已三度中柱，否則早已大炒。預計日本今仗會作出輪換，吉田麻也、遠藤保仁同有輕傷嘅箭頭岡崎慎司等或被收起，另守將今野泰幸亦會因傷缺陣，不過日本後備質態兼備，清武弘嗣、武藤嘉紀、射手豐田陽平都能擔大任，仲有未上過陣嘅新星柴崎岳同植田直通亦已蓄勢待發，呢班球員為博表現戰意更濃，面對近年令佢哋吃過唔少苦頭嘅約旦，當然力求盡炒冇手軟。

約旦首仗對伊拉克兩隊加埋射門都唔夠10次，仲頻頻斷纜攻勢冇組織，整體水平高唔得過港超聯。上仗大炒巴勒斯坦都只係好彩，對手喺頭30分鐘表現及入波機會都在佢哋之上，只係巴勒斯坦欠經驗亦不設防，結果上半場末段失球後迅速崩潰，不過約旦全場控球指數仲低過對手，賽果反映唔到真實，今仗焗住同日本對攻，只會輸得更快更多。
伊拉克搶韁「勒」唔住

同時上演嘅仲有伊拉克對巴勒斯坦，伊拉克勝在夠年輕，上場對日本總共用咗10名90後球員，今仗對手由最強轉最弱，當然會搶攻；首次參賽嘅巴勒斯坦兩連敗共失9球，而且愈踢愈開放，今仗賽前揚言要入波甚至希望贏番場，兩隊鬥攻下1.5倍大盤係過關佳選。

（now 672周二下午5時直播）