熱刺打殘錫菲聯

猪拉多纳

哈利仔騷哥利續肥約

今晚將上演另一場英格蘭聯賽盃4強戰首回合，熱刺主場恭候錫菲聯。熱刺難得抽到好籤，避免提早同利物浦及車路士硬撼，大有機會殺入今屆決賽，今晚仲唔憑住主場之利入多兩粒建立領先優勢咩？1.83倍「讓主」唔好錯過。

（TVB301、廣東體育周四凌晨3:45直播）
普捷天奴摸熟隊波 近10戰7勝韌力勁

提起熱刺就不得不提今季大勇嘅前鋒哈利卡尼，據《ESPN》透露呢位小將喺季初簽咗份長約，但為咗嘉許佢嘅貢獻，熱刺嚟緊會醒份肥約過佢大幅加薪。事實上「哈利仔」今季轟入18球咁勁揪，球隊想用新約綁實佢非常正路，但一季未完咁快又畀多次新約係堅難得，既然熱刺啲頭頭咁識做，「哈利仔」梗要用士哥答謝球會啦！

事實上領隊普捷天奴經過半季摸索後，已經調整好隊波，近10戰取得7勝2和1負佳績，強如車路士嚟到白鹿徑球場亦要跪低，更何況實力差兩班嘅錫菲聯先？值得留意嘅係，呢支倫敦球隊韌力十足，有統計指佢哋今季喺比賽末段（88分鐘起計）嘅入球，一共為球會攞多10分，咁有拚勁捧場客就唔驚佢哋會Hea踢啦。

對手錫菲聯喺今屆賽事予人驚喜，先後揮低修咸頓同韋斯咸殺入4強，演出有晒交代。但嚟到4強階段大賽經驗好重要，呢點錫菲聯肯定較輸蝕。再者佢哋早前連環越級挑戰成功，班波隨時心雄搶攻，到時盞得不償失。