曼聯愈那渣愈富貴

猪拉多纳

奧脫福爆鼠患 照賺51億

紅魔鬼愈污糟愈有米？曼聯主場奧脫福近日被傳媒踢爆淪為「老鼠樂園」，不過無損佢哋嘅吸金能力，尋日公布嘅世界球會搵銀榜，曼聯狂挖4.332億鎊僅次皇馬排全球第二。受此利好消息刺激，周六凌晨英足盃第四圈作客乙組仔劍橋聯應可順利過關。

（now 621及633周六凌晨3時55分直播）

據英國《每日郵報》同《太陽報》爆料，被譽為「夢劇院」嘅奧脫福球場近期「鼠輩橫行」，鼠患由重災區南、北看台蔓延到球場各部分，就連職員辦公室甚至球場草地都有鼠蹤。消息人士透露：「啲老鼠簡直係惡夢，曼聯完全搞佢哋唔掂。」其實早喺2006年、2010年同2012年，奧脫福已被發現喺比賽期間有老鼠「擅闖球場」，據早前一份《英超球場衞生報告》透露，奧脫福餐廳有爛地板、食物殘渣滿布地下、廚房地板又濕又油立立、生肉只係擺喺雪櫃頂等等，衞生評分同般尼位列英超最低。
僅次皇馬排搵銀榜No.2

球會方面已經搵咗滅蟲公司定期滅鼠，並且制訂了「害蟲應急機制」，為更大規模鼠患一旦爆發做好準備。雖然球場衞生情況咁惡劣，不過似乎暫時無損紅魔鬼形象，由著名會計公司德勤發表嘅13/14球季世界球壇搵銀榜，曼聯就以4.332億鎊（約51億港元）排第2，比之前球季增長接近20%，僅次於皇家馬德里嘅4.595億鎊（約54億港元）。
英足盃「-2」炒起劍橋聯

講番周六凌晨嘅英足盃賽事，劍橋聯現排英乙12，球會今次冇話因為對手係曼聯而加票價，球會CEO早前仲曾經參加馬拉松籌款，助球會渡過難關，可以講係良心老細。曼聯經過季初英聯盃災難性出局，上圈面對伊奧維明顯已經加多兩錢似緊，曼聯「讓二球」照捧讓球客勝。