諾域治讓得辣明醒賓福特

猪拉多纳

如果有睇開呢個專欄，都知道肥叔一見到中國國家隊賽事都避之則吉，一來以往畀佢哋跣得太多，二來都要為讀者負責。不過國足於今屆亞洲盃嘅表現，令人眼前一亮，最終殺入8強畀東道主澳洲淘汰雖敗不辱，嚟緊不妨留意下呢支正在復甦嘅「龍之隊」。講番今晚推介，英冠諾域治主場迎戰賓福特，前者讓半一太多，捧番下盤。

（TVB 301周六晚11時直播）

肥叔喺球壇打滾多年，識落唔少猛人，眾所周知英冠球隊賓福特老闆係肥叔世姪，呢位猶太人有幹勁做生意又叻，今季升上英冠後勢頭幾好，一直穩守中上游。但世姪深知英超係另一個世界，若果下季升到班，班波未必能承受龐大壓力，仲要使一筆大錢擴軍，唔多划算，寧願先喺英冠站穩陣腳，累積多啲經驗再諗「衝超」，所以賓福特有段時間無喇喇跌Watt，相信係話事人有心咁做。
李城專注護級唔阻熱刺

不過呢啲嘢唔可以做得太着迹，睇番賓福特近期亦重返正軌，今仗作客諾域治，「金絲雀」上季仲係英超分子，之前連贏卡迪夫城及一哥般尼茅夫難免聚飛，但讓到半一實在過火，肥叔認為賓福特受讓不妨入貨。至於英足盃第4圈，熱刺主場硬撼李斯特城，「狐狸」依家喺英超排包尾，邊得閒去爭盃賽，今仗隨時揸流攤，熱刺讓半一照撐上盤。

（周六晚11時開賽）