比歷連尼計數曳

猪拉多纳

做人同踢波一樣，最緊要有自知之明、知所進退，懂得幾時收放往往就係成敗關鍵。阿仙奴上仗作客擊退曼城，勝在肯放低身段，放棄控球伺機反擊，最終獲得一場充滿說服力嘅勝仗。「藍月亮」上年歐聯16強首回合主場0:2不敵巴塞隆拿，但領隊比歷連尼唔認命決定強陣反撲，反而喺次回合比賽前嘅足總盃8強對英冠球隊韋根以半力出擊，結果兩條戰線一齊玩完。如果計算精明啲，棄歐聯保足總盃，曼城上季可能有機成為「本土三冠王」。
中場多傷兵難破米堡

曼城今晚又再度喺足總盃出擊，鑑於下周末與車路士嘅榜首大戰，今晚布陣有所保留合情合理。不過對手米杜士堡喺前皇馬鐵衞卡蘭卡執教下，展現出頑強防守力，27仗只失18球，反觀曼城喺三位中場主力拿斯尼、耶耶托尼及林柏特齊齊缺陣，中場滲透能力更顯薄弱。最慘係剛傷愈嘅阿古路未重拾狀態，要重新撻着相信仍要一段時間，想攻破由前皇馬球員活基治領導嘅米堡防線，相信有一定難度。

（now621及633台周六晚11:00直播）