赤道畿內亞頂唔住加蓬

猪拉多纳

冇人願歸化 港援當國寶

非國盃Ａ組最後兩場分組賽今晚同時上演，主辦國赤道畿內亞係呢組實力最弱球隊，要倚重喺港超聯標準流浪都踢得唔多掂嘅老兵艾雲領軍，頭兩場分組賽唔使輸已經執到，今晚喺巴達市面對同組實力最強嘅加蓬冇運行，推介1.83倍客Ｗ。

（周一凌晨2時開賽）

赤道畿內亞根本冇踢非國盃決賽周水準，喺世界盃外圍賽小組賽不但包尾，仲係40隊中失波最多嘅球隊，今屆非國盃外圍賽亦因為出錯球員出局，但因「原主辦國」摩洛哥爆發伊波拉病毒退出，至由佢哋頂上做東道主先有份踢。雖然足總好努力咁邀請有該國血統嘅球員歸化，但稍有分量嘅球員都耍手擰頭，包括森多利亞主力中場奧比安同馬拉加18歲天才麥切尼都拒絕入伍，令佢哋限米煮限飯，要倚重効力港超聯標準流浪嘅34歲老兵艾雲領軍，艾雲喺標準流浪踢防中都錯漏百出頻受批評，點知返到赤道畿內亞被視為國寶，連續兩場分組賽都踢足，不過佢哋表現平平，兩場波都畀人壓住嚟打，唔使輸都係靠運氣同球證偏幫。

赤道畿內亞今晚遇上同組最強嘅加蓬，仲有主力中堅麥比利累積兩面黃牌要停賽，想守和都難。加蓬首仗兩球輕取布基納法索，次仗因為多蒙特箭頭奧巴美揚敗家至意外咁輸畀剛果，今晚面對最弱東道主可望重響勝鼓。
布基納法索絕地反擊剛果

同時上演仲有剛果對布基納法索，剛果兩戰得四分排榜首，布基納法索兩戰只得一分排包尾，但布軍客Ｗ熱到得1.92倍仍然被睇好，事實上剛果三線實力都差一皮，前兩場踢到拖泥帶水相當符碌，相反布基納法索擁有多名喺歐洲頂級聯賽擔正球員，前兩仗控制戰局但射極唔入，今場背水一戰值得再追。