莫帥發音波功震懾球證

猪拉多纳

車路士領隊莫連奴一向多計，早前又玩另一招，話車仔史丹福橋球場嘅球迷，係全英超最安靜、最斯文嘅球迷；點解成績咁好佢仲要咁講呢？

原因好簡單，因為車仔嘅佳績有時會寵壞一班擁躉，而且倫敦亦有阿仙奴、韋斯咸、熱刺等多間球會，難免分薄咗車仔粉絲人數，形成「藍戰士」於主場作戰時球迷起哄程度唔夠，冇咁容易影響到球證喺一啲五十五十情況下，作出對主隊有利嘅判決。始終英超競爭激烈，若果有一場半場失咗分，去到季尾可能就係差嗰一兩分而緣盡冠軍。
Home Dog聖伊天受讓着數

其次係莫連奴不斷製造場內場外嘅話題，藉此令大眾將焦點放喺自己身上，從而為麾下球員減壓，難怪佢哋今季順風順水，繼續穩居榜首啦！嗱，呢啲一章都唔蝕嘅招數，Peter肯定我哋嘅香港教練們要多多學習。至於今晚賽事，Peter推介一場冷門賽事，就係法甲尾場聖伊天主場對巴黎聖日耳門（TVB 302周一凌晨4時直播），前者依家於聯賽排名第四，今季打出蔗渣價錢燒鵝味道，今仗有埋主場之利兼受讓，呢隻Home Dog（門口狗）實在值得小敲。
金句：莫連奴百寶層出不窮，唔食腦點做一級領隊呀