國米拖連奴玩大佢

猪拉多纳

友妻門襟兄弟冤家路窄

意甲唔只有「電話門」，仲有「友妻門」事件，今晚國際米蘭主場對拖連奴，兩位男主角莫路伊卡迪同麥斯盧比斯正面交鋒，花生友準備等睇好戲。莫路伊卡迪今季成為國米首席射手，一副勝利者姿態，當然唔衰得。拖連奴前鋒麥斯盧比斯為捍衞尊嚴，必搏老命入波挽面子。兩位阿根廷人勢必擦出火花，直取2.02倍大盤。

（TVB 302周日晚10時直播）

莫路伊卡迪兩年前搭上麥斯盧比斯老婆娜拉，搞到對方離婚，之後仲同娜拉雙宿雙棲，堪稱意甲賤男代表。不過呢位21歲前鋒行緊「事業運」，今季意甲已有10球進帳。國米近期引入普多斯基、梳頓沙基利等好手，令莫路伊卡迪喺前線有更多支援，以此子搶得就搶嘅作風，遇到手下敗將肯定踩多腳，用入波羞辱對手，證明娜拉同佢一齊係正確決定。

30歲嘅麥斯盧比斯唔只冇咗老婆，仲慘淪為人球，近3年踢過4支球隊，剛於月中由基爾禾加盟拖連奴，僅相隔1個月又同仇人碰面。麥斯盧比斯上次後備出場，冇乜時間同莫路伊卡迪交手，但今仗有望擔正仲唔搏老命咩。國米一對中堅蘭奴捷亞及祖安古靴美分別因傷停缺陣，長友佑都仲未歸隊，令麥斯盧比斯有機可乘。
祖記回勇炒起基爾禾

而榜首祖雲達斯近期踢番順，保羅普巴及泰維斯大勇狂數胡，球隊近3仗轟入13球今場炒得起基爾禾，祖記讓兩球都要讓球主勝。（TVB 301周日晚10時直播）至於次席羅馬雖然狀態回落，但畢竟近9場聯賽不敗，今仗作客費倫天拿有得受讓平半，要下盤。

（TVB 301周一凌晨3時45分直播）