廠仔強勢客客送禮

猪拉多纳

炒完史篤城再贏曼城，阿仙奴家陣強勢停不了，今晚佢哋喺足總盃第4圈出擊，試問區區一隊「英冠仔」白禮頓又點會頂得住吖？兵工廠領隊雲格事先張揚會進行輪換，預期禾確特、奧斯爾同施捷斯尼都會悉數披甲，當中「大眼仔」更加要證明身價搶番正選，由佢同「禾仔」孭飛肯定唔會放過白禮頓，一於捧1.95倍「客客」，撐阿仙奴由頭贏到尾！

阿仙奴名宿亨利轉行做講波佬後，竟然踩舊會表現大不如前，禾確特就大唱反調，覺得依家球隊進攻組合係有史以嚟最勁，仲堅過當年柏金搭亨利多多聲！「禾仔」咁囂又無他嘅，畢竟阿歷斯山齊士今季已攻入12個聯賽士哥，轉打攻擊中場嘅辛迪卡索拉又On Fire，邊隊會唔赦阿仙奴吖？
奧斯爾踢爭氣波

呢支倫敦球隊早前大炒史篤城3蛋，跟手作客仲淨勝曼城兩粒，狀態弗到漏油。雖然球隊仲有韋碧克同阿迪達等十字軍，加上「教授」決定派遣部分傷愈嘅球星落場，但以禾確特、奧斯爾同路斯基組成嘅攻擊組合腳法、技術、速度兼備，「大眼仔」為搶番正選又要搏命取悅雲格，今鋪點睇都唔似會揸流。
白禮頓狂易帥

白禮頓今季勁濕滯，開季至今猛咁換領隊，加西亞之後到希比亞，家陣就由前紐卡素主帥曉頓領軍，但成日易帥，你叫班手足點適應呀？佢哋現時英冠積分榜排下游位置，諗掂點護級仲實際啦，同阿仙奴駁火咪盞送死。況且白禮頓今季英冠主場14戰贏得3場，有地利都唔見有優勢，對住阿仙奴唔似爆得出。
盤路解碼

阿仙奴近7次出戰英總，其中6場最少攻入對手2球。
英總交手阿仙奴全勝：Data King

‧阿仙奴射手基奧特近7次喺英總上陣斬獲5球。

‧雙方史上4度喺英總交手，阿仙奴全部贏晒。

‧白禮頓近12次主場出戰英總僅得1敗，但對手正正係阿仙奴。
雲格「是但噏」金句

‧我完全反對設立國際足球金球獎，我鍾意團隊足球，唔會為任何人投票。

‧英格蘭應該廢除限制外援數目條例，我喺迪馬利亞17歲個陣已經想簽佢，但外援條例唔畀我咁做。

‧我執教阿仙奴已經18年，接受0.01%嘅人唔尊重我，如果球迷唔高興，我會接受但唔會走。