蝙蝠主場惡慣喪咬西維爾

猪拉多纳

除咗皇家馬德里、巴塞隆拿為西甲錦標爭崩頭，華倫西亞同西維爾亦要為來屆歐聯入場券努力，兩支實力分子今晚正面交鋒，合演一場「6分波」。「蝙蝠兵團」主場出擊不嬲信得過，加埋近況唔錯，呢場波可以睇高一線，2.02倍主勝信得過。

（now632台周一凌晨4:00直播）
爭前4搶歐聯入場券

華倫西亞今季喺自己地頭戰績甚佳，齋計主場得分嘅話，佢哋同馬德里體育會並列第1，強如「銀河艦隊」都要喺米斯泰拿球場擺低3分，搞到22連勝走勢斷纜，證明「蝙蝠兵團」地頭夠晒惡。佢哋個前鋒洛迪高摩連奴近3仗有兩個「士哥」，加埋倒戈嘅尼格度同今季大熟大勇嘅中場柏利祖，唔怪得之火力咁強勁啦，就算箭頭之一嘅皮亞堤受傷都冇有怕！仲有喎，華倫啱啱喺西班牙盃出局，今季唯一目標係爭聯賽前4，今場梗係要搏啦！

西維爾早排連續10場不敗，但要留意番呢班對手全屬中下游球隊，上周中西班牙盃作客遇上愛斯賓奴即時現形，以1:3敗走，士氣或多或少會受挫。最重要一點係，西維爾作客戰績唔多掂，今季造訪「地上最強」、畢爾包等實力分子都敗陣而返，今鋪去到「蝙蝠洞穴」睇怕都好難踢咯！