巴塞上盤體定嚟食

猪拉多纳

8強次回合 首回合巴塞勝
1:0 Lead住一粒 搵機會整多粒

西班牙盃8強次回合矚目大戰今夜深宵爆發，馬德里體育會返主場迎擊巴塞隆拿。巴塞唔單止有1比0領先優勢，佢哋近6仗贏晒兼狂轟23球，攻擊力堅恐怖，「新比利」尼馬更用行動證明佢能夠同王牌美斯共存互補，馬體會今季已兩敗巴塞腳下，落後下焗攻隨時死快啲，巴塞小讓平半，值得再追。

（now 632周四凌晨4時直播）
美斯尼馬愈夾愈合拍

巴塞教父告魯夫曾經講過，話上季尼馬加盟意味住美斯可以走人，因為一山不能藏二虎，但經過一季磨合後情況漸入佳境，尼馬於今季各項賽事合共攻入19球，比上季全季嘅15球仲多，平均每87分鐘就有一球斬獲，效率提升咗一倍，而且有8球更係由美斯助攻畀佢，足見二人雙劍合璧，威力真係唔講得笑。

除咗同美斯愈來愈夾外，尼馬又鍾意插花過人，對方好多時要用超技術阻止佢，今季「新比利」一共被侵犯72次，冠絕西甲，並且令對手食咗16張黃牌，當佢吸引咗敵軍後衞注意時，亦間接為大佬美斯製造更多空位。踏入2015年，呢位球王踢咗6場入8粒加4次助攻，強勢回歸，令巴塞近6仗全勝狂入23粒，日前豪贈艾爾切6蛋之役，主帥安歷基特登收起另一前鋒蘇亞雷斯，擺明留力搏呢場。
馬體會焗攻隨時中伏

馬體會喺教頭施蒙尼領導下擅打反擊，但由於首回合輸0比1，今仗惟有搶攻圖收復失地，好可能打雙箭頭陣式，但咁反而令「床單兵團」陷兩難局面，不但未能凸顯「王子」費蘭度托利斯及文迪蘇傑嘅特長，焗攻下又要將防線前移，後場暴露更多空位，面對巴塞咁恐怖嘅攻擊隨時中伏，一旦被對手整多粒作客入球，咁就更難翻盤。更何況巴塞今季兩鬥馬體會都贏晒，一洗上季6度交手未贏過頹風，令球員重拾信心，雖然今仗作客小讓平半，但斯維仍然力撐巴塞上盤。