巴塞殲滅狂派馬體會

猪拉多纳

安歷基戰術食住施蒙尼 西班牙盃8強次回合

西班牙盃冠軍前哨戰爆發，馬德里體育會喺8強次回合主場對巴塞隆拿，即使首回合輸0:1要追番，都唔似有運行，畢竟「狂派代表」施蒙尼嘅戰術被對方新教頭安歷基食住，而且美斯逼宮成功後已徹底翻生，唔再散步行行企企，少讓平半唔難繼續帶挈大家收錢！

（now632台周四凌晨4:00直播）
今季交手兩連勝 馬體會靠12碼破蛋

馬體會喺施蒙尼帶領下，一直有力同皇家馬德里拗手瓜，但好奇怪，今個月馬體會兩次對巴塞都輸波，聯賽首循環先輸1:3，西班牙盃8強首回合再輸0:1，反映施蒙尼要求球員搏到唔要命嘅「狂派戰術」，鬥唔過巴塞新教練安歷基，特別係馬體會入嗰球，都只係靠文迪蘇傑射入12碼咋，陰功！

另一方面，巴塞日前喺聯賽淨數艾爾切6蛋後，連贏6場不突止，期間更狂入23球，當中有5場保持清白。雖然蘇亞雷斯始終未入局，但除咗美斯大爆發，就連尼馬都加入屈機行列，對艾爾切梅開二度後，個人今季上陣24場喪入19球，而且佢有8個入球由美斯助攻，簡直夾到冇人有。
巴塞6連勝勁入23球

講起美斯，據講佢已經鬥贏教練安歷基，自從佢喺歇冬後對皇家蘇斯達無厘頭坐冷板，發脾氣嗌轉會後已得到主席巴度美奧保證，以後巴塞嘅戰術同陣容都會圍繞佢打造。結果美斯即刻交貨，近5次落場有8個入球、4次助攻，成為西甲史上首個連續7季入球「20＋」球員，弗到咁邊有得擋呀？
盤路解碼

巴塞近6場5次開「讓球勝」。
Data King：美斯連續5場有士哥

‧馬體會近10場得2次保持清白。

‧巴塞近18場有16勝1和1負。

‧巴塞連續6場半場不失。

‧巴塞前鋒美斯近5次落場均有波入。
乜都玩錦囊：巴塞半場硬淨捧半勝

巴塞今季連續兩次對馬體會都贏波，反映新教練安歷基嘅戰術，食得住對方教頭施蒙尼打法。加上巴塞已經連續6場半場不失，唔容易失波，假如大家想要高回報，就可以考慮揀巴塞2.55倍半場勝，唔使等足全場就收錢都幾過癮。