蘇斯達鐵桶細頂皇馬

猪拉多纳

(六)17 皇家馬德里 Vs 皇家蘇斯達

西甲「雙皇會」皇家馬德里主場對皇家蘇斯達，皇馬受兩大不利因素困擾，第一係射手C朗停賽，削弱入波能力，第二係教練安察洛堤一直被對手主帥莫耶斯剋死，兩人曾於英格蘭賽事六次交手，「肥安」僅得四和兩負，「銀河艦隊」今仗有暗湧。莫耶斯有「悶死」巴塞前科，預料會沿用鐵桶陣死守，入球中位數3.5球，1.72倍細盤值博。（now 632周六晚11時直播）
C朗停賽火力減

皇馬患上「C朗依賴症」，今季聯賽有43%入波由C朗攻入，今場呢位葡萄牙巨星缺陣之下，相信皇馬火力猶如減半。雖然陣中仲有唔少球星，但佢哋埋門把握力麻麻，尤其係加里夫巴利非常獨食兼浪費機會。今仗冇C朗壓場，眾星隨時各自為政。

值得留意，安察洛堤以前執教車路士兩季期間，同當時由莫耶斯領軍嘅愛華頓踢過四場英超，「肥安」得兩和兩負，以及2011年足總盃，雙方亦兩次打和，最終愛華頓憑互射12碼淘汰車仔，莫耶斯可以話連運都贏埋。

事實上，莫耶斯不時有神來之筆，最經典肯定係月初帶領蘇斯達爆冷以1比0擊敗巴塞，該仗莫帥佈下緊密防守戰術，令巴塞眾星老鼠拉龜。相信莫耶斯今仗繼續採取「死守突擊」，皇馬要咬入佢哋並唔容易，入球細捧得過。