林伯復仇 細紀激鬥

猪拉多纳

車路士 曼城

英超「冠軍戰」爆發！榜首車路士會喺主場迎戰「二哥」曼城，如果車仔今晚喺史丹福橋球場贏波嘅話，冠軍路將會一帆風順！當然，曼城唔係善男信女，撞啱兩隊都有進攻主力缺陣，「林伯」倒戈復仇當然精彩，但想睇入球騷就難啲囉，一於玩1.82倍「入球細」啦！
迪哥坐3場波監 法比復操

車路士「士哥茅躉王」迪亞高哥斯達，喺聯賽盃4強先後踩安利簡恩同史卡迪爾，英足總喺尋晚正式作出判決，今季喺英超入咗17球嘅「迪哥」，要坐足3場波監！車仔領隊莫連奴梗係嬲到震啦，佢仲拒絕出席賽前記招以示抗議添，講真，車仔鋒力係大打折扣，但「迪哥」咁茅，怪得邊個？

當然，Yennie都明白「寸王」之所以咁躁，因為車仔「助攻王」法比加斯亦喺對利物浦嗰陣整親，雖然法比仔前日返番球場做簡單嘅操練，但狀態仲要慢慢操番起，今晚即使披甲都係紮住上，表現點會好？霎時間冇晒「士哥王」同「助攻王」，又難怪莫連奴咁頭痕嘅，既然強攻冇本錢，車仔呢場波好大機會改玩穩守，要入波真係唔易。
曼城YaYa 邦尼踢非國盃

對家曼城都唔齊章，除咗有耶耶托尼同韋菲特邦尼為科特迪瓦征戰非國盃，拿斯尼又要2月中先復出，雖然林柏特擔正都OK，但自從冇咗「YaYa」，曼城連續2場英超輸波，相信比歷連尼自己知自己事，今場波以穩守唔輸為目標。

講開「林伯」，舊年佢想要一紙長約，但車仔就死都唔肯畀，卒之搞到呢位忠臣無奈離隊。林柏特今晚重返史丹福橋上演復仇戰，大家一定要早啲開電視，睇吓車迷用掌聲定噓聲「迎接」佢喇！分分鐘呢一幕仲精彩過場波囉！
Data King：「莫比」對賽寸王佔優

‧兩軍領隊莫連奴同比歷連尼對上11次交手，「寸王」取得7勝2和2負。

‧「藍戰士」連續5仗聯賽主場零封對手。

‧伊雲洛域連續3場英超交出助攻。
盤路解碼

車路士近5次聯賽主場鬥曼城開出4口入球細，細盤率為80%。