藍戰士欠風度 哥斯達冇球品

猪拉多纳

球隊同球員能否得到Fans歡心同愛戴，成績好不在話下，但踢波風格同埋球品就更重要。好似車路士箭頭迪亞高哥斯達今季初到英超，極速融入球隊，加埋入球效率高，令球迷感到驚訝，但同時間其霸道、潑辣嘅踢波風格，就令唔少Fans咋舌。好似啱啱禮拜二英聯盃對利物浦三度抽水，更成為球迷、球評家口誅筆伐嘅對象。英格蘭足總亦已經秋後算帳，相信呢位西班牙國腳至少要停賽3場，睇怕今晚場大戰隨時要留喺屋企好好反思。

事實「藍戰士」最近亦被炮轟欠缺風度，好似2011年舊將波歷克率利華古遜回歸、去年杜奧巴率加拉塔沙雷重返史丹福橋，車路士高層都事先張揚為昔日戰將舉行賽前歡迎儀式，仲有紀念品送贈，有情有義。點知今晚輪到林伯特帶領曼城造訪，「車仔」就毫無表示，擺明大細超，唔知「林8」到時會唔會谷埋一肚氣又再倒戈入波？
林8返史丹福橋受冷待

論近況兩隊同樣未喺最佳狀態，陣容亦未見完整，「藍戰士」缺少菲臘路爾斯、法比加斯及迪亞高哥斯達3位主力；至於科特迪瓦進身非國盃8強，曼城亦肯定失去耶耶托尼及韋菲特邦尼。車路士周中激戰120分鐘，個別球員好似奧斯卡杜斯山度士、韋利安等人喺末段已呈露疲態，好在「藍月亮」由於阿古路、迪斯高同埋祖維迪都缺態，亦唔見得有着數。

車仔領隊莫連奴最叻計算，主場不敗即可保住5分優勢，以保守態度靜待曼城主攻伺機反擊，相信會係「藍戰士」今晚嘅作戰策略。

（now621台周日凌晨1:30直播）