史特加博大「慕」

猪拉多纳

魔鬼特訓有料到

德甲重開後好戲連場，幾支前列球隊都心急搶分，其中排第4嘅慕遜加柏今晚會作客史特加。呢兩季史特加成績都麻麻哋，今季仍然係受緊降班威脅。好在成隊波歇冬期間去咗葡萄牙進行「魔鬼特訓」，效果似乎唔錯，今場對住不復季初勇態嘅慕遜，我睇好佢哋有力一戰，今場一於玩入球大。

（有線61、201及廣東體育周六晚10:30直播）

史特加歇冬前排聯賽榜第15位，佢哋歇冬前臨尾3場波搏到1勝2和搶咗5分，可以暫時脫離降班地帶，比起上年曾經一度跌到落榜尾，已經有好大進步。
列拿朝早6點加操

教練史提芬斯好明顯想再斬多四両，喺呢個歇冬期拉隊去葡萄牙集訓，據聞訓練都相當刻苦吓，例如中場摩列斯列拿就曾經被「柯打」晨早6點起身加操！好在喺苦練之後都有番啲回報，史特加休戰期間踢4場熱身賽有3勝1和，史提芬斯都話好滿意班波嘅狀態，睇嚟反彈有望。
慕遜鍊德甲棄歐霸

另邊廂客軍慕遜加柏都冇偷懶，拉隊去咗土耳其集訓，可惜有德國國腳安達夏恩整傷足踝，今場肯定缺陣。幸好呢班波火力都算勁，瑞士門將恩尼森馬仲爆料話，球隊上下以爭取德甲好成績列為首要目標，歐霸盃只係其次。今場畢竟係2015第一場正式比賽，下半季頭威頭勢，相信作客史特加都會照攻，兩隊戰意鮮明，1.78倍入球大可期！
頂占筍盤：史特加（入球大）