10個理由睇死哈化

猪拉多纳

德甲早場雲達不來梅主場對哈化柏林，兩隊都要護級，不過哈化歇冬前已經頹爆，歇完冬仲衰多兩錢重，黑柴有10個理由睇死佢，不來梅主場小讓平半撐上盤。

（有線61及64台周日晚10時30分直播）

哈化柏林歇冬前主場慘吞賀芬咸五蛋，歇冬更冇厘神氣，睇衰佢哋有10個理由：（1）將帥不和－陣中好多球員都不滿教練盧爾侯卡，包括公開表明唔妥佢嘅箭頭沙洛文卡勞。（2）欠創造性－首循環平均控球指數係德甲最低一隊，射門次數亦僅多過科隆排尾二。（3）防線不穩－上季全季只失48球，但今季半季已失35球，門將卡夫達甩漏極多。

（4）慣衰收尾－今季失35球當中，有10球係最後15分鐘失守，其中三球仲係補時至失。（5）買人不力－球會經理比列斯喺首循環結束時聲稱有需要增兵，但成個歇冬期乜人都冇買過。（6）下半季頹－近季常做升降機，逢喺德甲下半季必散，上季下半季只攞13分，大前季更只得11分，而且歇冬後首仗都係零入球兼輸。

（7）作客奇差－上半季八場作客只攞到五分。（8）往績輸晒－近六次作客對不來梅全敗。（9）準備極曳－歇冬期熱身賽對德丙嘅科特布斯同賀利舒查都輸。（10）陣容超殘－主力史基布特、鮑祖漢、賓哈迪拉同施格斯因傷缺陣，細貝萌停賽，沙洛文卡勞踢緊非國盃。
不來梅主場贏得

不來梅情況相反，水浸眼眉痛定思痛，歇冬準備積極，熱身賽接連擊敗科特布斯、慕遜加柏同漢諾威，既向賀芬咸收購中堅維斯達加特，亦有首席射手迪山度傷愈復出，今晚主場出擊贏得！