新兵有料到 阿仙奴維拉做大騷

猪拉多纳

英超轉會窗將於當地時間2月2日關閉，各隊都磨拳擦掌增強兵力，今日兩支碰頭球隊，力爭歐聯資格嘅阿仙奴主場鬥全力護級嘅阿士東維拉，都有新兵加盟，可以話相當積極，傳統以來兩隊交手都多波入，今場捧1.57倍入球大啱數。

（now621台周日晚9:30直播）

論牌面今場一定係4連勝嘅阿仙奴秤先，不過讓球主客和讓到兩球，確實有少少保留，與其阿仙奴要入到三球先開到個「讓球主勝」，倒不如穩陣少少玩入球大，畢竟維拉近年作客阿仙奴都相當旺大，近6次作客酋長球場都成功開出。

事實上，阿仙奴自基奧特、奧斯爾等攻擊主力復出後都唔愁冇波入，除元旦日對修咸頓因踢得較密表現失準外，其餘賽事都交足貨，近11場比賽有10場取得兩個入球以上，當中有8場開大，其餘3場開唔到大都有2個入波，起碼有得「叫胡」先。
維拉經常攻破兵工廠

阿仙奴賽前從維拉利爾羅致巴西後衞基比爾包列斯達，此子能勝任後防所有位置，對後防一向不穩嘅「兵工廠」嚟講簡直係絕佳收購，不過雲格就話佢初嚟甫到，今場未必會派佢上陣，兵工廠嘅防線仍有一定隱憂。

至於作為英超入球最少嘅球隊維拉，近期亦有補強，由華倫西亞加盟嘅前西班牙小國腳卡利斯基爾，已經喺足總盃取得處子入球，可見冇入錯貨，另外亦成功借用快翼史葛冼佳亞，相信對維拉攻力有一定幫助。值得留意係，維拉經常喺阿仙奴身上入到波，今場球迷大可買定花生等睇入球騷。
維迪斯鬼盤咪掂

另一場值得留意係荷甲維迪斯主場對阿積士，維迪斯作為專為車路士練兵嘅車仔B隊，Hea踢人所共知，今季成績亦極沉淪，排12落後次席嘅阿積士21分，主場亦僅得3成勝率，近兩場更分別被海倫芬同格羅寧根大炒，但今場對阿積士竟要讓波真係奇聞，如此鬼盤純粹同大家分享，不作推介。