猛虎出柙 曼聯拆橋

猪拉多纳

尹戈爾為法卡奧轉陣

英總第4圈重賽值得大家捱眼瞓，曼聯喺主場再遇劍橋聯，應該唔敢再衰，畢竟佢哋作客被乙組仔守和0:0，已經畀人笑到面黃，撞啱領隊尹戈爾放風唔再打壓法卡奧，打算將3-4-3改番做4-4-2遷就佢，「老虎」發威咪當佢病貓，「-2」照捧1.63倍「讓球主勝」！

（now621、631及668台周三凌晨3:45直播）

近排曼聯氣勢回落，領隊尹戈爾又被網民恥笑做「天才」。不過點都好，紅魔日前喺聯賽主場以3:1打沉李斯特城，法卡奧門前補中總算有波入，而且佢無論保持控球，抑或走位入楔都好掂，睇得出已捱過低潮，信心返晒嚟隨時又有料到。
紅魔或留力鬥韋斯咸

記得尹戈爾話過，唔會理法卡奧坐冷板唔開心，總之佢嘅柯打就要聽，甚至暗示過放棄買斷佢。好在「老虎」識得自救，連尹戈爾都讚佢入波時反應快，又承認卡域克養傷後，打算繼續用4-4-2食住上。目的咪喺安排法卡奧多啲打正選囉！

雖然曼聯作客被劍橋聯守和場波，選擇收起朗尼，尹佩斯都只不過以後備身份落場，唔排除今場又會玩留力，應付跟手作客韋斯咸嘅聯賽，但最近佢哋嘅傷兵問題已好番好多，位置上嘅競爭將會好激烈，有得落場嘅球員點會唔搏？
劍橋聯靠查域克孭飛

劍橋聯陣容削大家都知，各位最熟悉嘅中場查域克係曼聯出身，不過上次兩隊碰頭，佢只能夠喺比賽尾段入替，唔使預佢有咩超級表現。至於借用嘅水晶宮前鋒卡基爾，只得19歲，踢乙組都唔係好識入波，旨意佢爆冷？難啲喎！
持械匪徒闖「天使」豪宅

另據《每日郵報》報道，上場曼聯聯賽贏完李斯特城後，迪馬利亞返屋企同家人食食吓飯，有3名持械匪徒硬闖「天使」豪宅，好彩間屋個警鐘突然響起，嚇到班賊仔掉頭走，總算有驚無險。
Data King：紅魔地頭11戰9勝

‧曼聯近11場主場9勝1和1負。

‧曼聯連續5場上半場不失。

‧劍橋聯近7場得1次冇波入。
乜都玩錦囊：半場曼聯1:0、2:0玩得過

曼聯近排防線回穩，特別係上半場打得好謹慎，對上8場更加得1次上半場失波，睇怕以劍橋聯嘅牌面，都好難係奧脫福入到波。假如大家唔想玩紅魔「讓球主勝」，其實半場波膽曼聯領先1:0、2:0都可以考慮， 隨時收完錢可以再玩即場投X呀！
盤路解碼

曼聯近4場主場有3次開「讓球主勝」。