冇C朗靠2B一樣掂 皇馬照o趙西維爾

猪拉多纳

今晚西甲有場補賽上演，一哥皇家馬德里喺主場迎戰西維爾，「銀河艦隊」雖有王牌C朗繼續坐波監，但高層欽點「大聖爺」加里夫巴利擔正，呢位快翼上仗獨食失機被鬧爆，點都要做番齣好戲證明自己，加埋法國射手賓施馬又係弗爆，有呢2B喺度即使C朗缺陣都影響唔大，加上撞正西維爾傷兵滿營，皇馬應可予取予攜，讓球主勝咪錯過。

（now 632周四凌晨3時45分直播）
巴利仔補鑊 唔敢獨食

皇馬一向以C朗為進攻核心，其他隊友都要為佢服務，但呢位葡萄牙萬人迷因衰衝動打人停賽兩場，畀到一眾綠葉表演機會，上仗反勝皇蘇四個一皮，賓施馬梅開二度兼轟入世界波，但加里夫巴利急於立功，卻因同占士洛迪古斯爭食而單刀射斜遭球迷鬧爆，賽後「大聖爺」亦要耍冧，以平息眾怒。

西班牙《馬卡報》爆料，話高層希望喺C朗坐波監期間，巴利仔可挺身而出做大佬，難得有高層咁睇得起你，呢位上季標王定必加多兩錢肉緊，用表現證明自己唔係獨食怪。

西維爾近況其實唔曳，可惜陣中有唔少傷兵，除咗中場泰莫連拿斯、基斯度科路因傷缺陣外，就連雷恩斯都唔能夠倒戈，而且日前主場險勝愛斯賓奴3比2一役，睇得出佢哋因搏得好盡而攰爆，話咁快又要硬撼皇馬，賽程咁密邊回得切氣呀？

季初雙方曾於歐超盃碰頭，西維爾亦淨吞兩蛋，且近4次作客巴拿貝球場均輸兩粒或以上，睇番皇馬依家只係比多打一場嘅巴塞多1分咁大把，如今仗贏波又可甩開4分，因此西維爾今仗睇怕都係「送死格」，皇馬要贏兩粒冇難度，斯維力撐讓球主勝。