剛共 科特迪瓦做慣「大」騷

猪拉多纳

非國盃今晚爆發4強大戰，由剛果民主共和國火併科特迪瓦。論名氣、實力，「大象國」當然秤先，但佢哋過去對住剛共並非一面倒佔優，1.47倍客勝唔多值博，既然兩軍碰頭都例演入球騷，轉捧2.15倍入球大仲划算！

（開賽時間：周四凌晨3:00）
韋菲特邦尼開齋

科特迪瓦箭頭韋菲特邦尼落實過檔曼城後，非國盃8強鬥阿爾及利亞即刻騷哥利梅開二度，就連坐完兩場波監嘅謝雲奴，一復出都省入今屆首粒入波，加埋喺分組賽錄得兩球進帳嘅麥斯格拉度，今場「大象三叉戟」擔正數胡，撞正對手防守中場兼隊長穆林保同後衞沙古亞尼養傷，要搵到入波話咁易啦。

另邊廂，剛果民主共和國拍落科特迪瓦嗰度，雖然好似差咁皮，但雙方近6次對決，佢哋都成功攻破「大象」大門外，錄得3勝1和2負，全部開出入球大，戰績絕唔輸蝕。而且剛共兩大射手馬保卡尼同謝利美保基拿，喺今屆非國盃已經貢獻咗4球，今場對住4戰僅得1場保持不失嘅科特迪瓦，相信要延續呢個「入波定律」唔難啫，一於捧「大」等睇入球騷。