拿玻里回勇開W冇「蘭」度

猪拉多纳

拿玻里喺最近一輪意甲作客以2:1擊敗基爾禾，近4場保持不敗，今晚意大利盃8強主場鬥國際米蘭，力爭延續不敗紀錄。事實上，「藍黑軍團」今季作客超級水皮，8月至今連盃賽只錄得4場勝仗，冬季積極增兵好似作用不大。拿玻里對住「作客蟲」，1.65倍主W咪嫌熱啦！

（now633台及TVB13周四凌晨3:45直播）
國米今季作客腳軟

拿玻里上月中輸畀「一哥」祖雲達斯之後，表現不跌反升，連盃賽在內近4場都保住不敗。雖然佢哋陣中有後衞高林等幾名球員受傷唔出得，但勝在一班主力都冇傷冇痛，尤其係前線嘅希古恩、咸錫同荷西卡利祖，將會肩負起攻堅責任，務求食住依家嘅強勢，加埋地利攻爆國米防線。

「藍黑軍團」今季成績麻麻，剛啱仲喺聯賽連輸兩場，搞到依家要喺聯賽榜中下游掙扎緊，冬季新兵普多斯基同梳頓沙基利雖然好波，但似乎仲未融入新東家嘅打法。再者，國米作客戰績曳到爆，所有比賽夾埋只得4勝，尤其對賽往績方面，近6次作客拿玻里又未贏過，橫睇掂睇都信唔過，都係撐主W穩陣啲。