馬體會爆艦熟晒路

猪拉多纳

首都內戰 C朗復出難救駕

西甲又再上演首都「馬德里打吡」，馬德里體育會主場迎戰「銀河艦隊」皇家馬德里，呢對同市冤家今季已第6次碰頭，前5次交鋒馬體會獲得3勝2和優勢，更何況皇馬兩位攻守主將占士洛迪古斯及沙治奧拉莫斯受傷缺陣。雖然話C朗坐完波監可以復出，但你估佢真係神咩，恐怕難以扭轉劣勢。皇馬今場仲要讓平半有啲牙煙，力捧馬德里體育會下盤。

（now 632周六晚11時直播）

出得來行預咗要還，皇馬上屆歐聯決賽「幸運」搶走馬體會嘅冠軍獎盃後，今季不斷還債，先係失西超盃，西班牙盃亦被對手淘汰，聯賽首循環主場再以1比2不敵馬體會，可見教練安察洛堤對住施蒙尼完全冇計。最大鑊係皇馬受傷停問題困擾，上仗擊敗西維爾付出沉重代價，兩大主力沙治奧拉莫斯同占士洛迪古斯傷出，左閘馬些路累積夠黃牌要停賽，會方揚言上訴，但未知能否成功。
皇馬一對中堅齊缺陣

皇馬防守本身就麻麻，依家冇埋沙治奧拉莫斯，加上比比養傷，換言之失去一對正選中堅，猶如中門大開，加上周中踢多場，體力亦輸蝕。無可否認C朗復出有助提升攻力，但佢過去受制於馬體會緊迫防守，發揮唔到最高水平。「銀河艦隊」傷停問題令攻守更失衡，今場隨時前面入埋唔夠後面輸。

馬體會依家落後榜首皇馬7分，今場正係拉近距離嘅好機會，前鋒費蘭度托利斯喺西班牙盃16強次回合對皇馬，上下半場閃電入波，其後鬥巴塞開賽未夠1分鐘就建功，可謂遇強愈強。如果費托可以再偷襲得手，馬體會要立不敗之地，並唔困難。加上基沙文、文迪蘇傑亦大勇，皇馬殘缺防線今次有難。