英超打吡夜 4強大激鬥

猪拉多纳

now621 今晚8:45直播

嘩嘩嘩，今晚係超級打吡日，英、西兩地齊齊爆發重量級打吡。早場先有「北倫敦打吡」熱刺對阿仙奴，緊接11點就有C朗孭飛嘅「馬德里打吡」，之後仲有「默西賽德郡打吡」，大家準備定啤酒、薯片喇喂！
倫敦宿敵「熱廠」射手交鋒

今晚英超早場上演北倫敦打吡，熱刺喺白鹿徑球場硬撼阿仙奴。兩隊積怨極深，由當年蘇甘保倒戈，去到上年禾確特嘅挑釁手勢、阿仙奴破錦標荒之後整咗個網站去計算熱刺幾耐冇拎過冠軍等等，今場肯定打甩髀。況且兩隊近期當弗，當中阿仙奴已喺各比賽5連勝，包括作客打敗曼城，睇怕今晚都係一場大手交易，一於捧1.68倍入球大。
基奧特 哈利卡尼腳風順

前鋒阿歷斯山齊士拉傷腿筋已錯過「兵工廠」大炒維拉5蛋一戰，佢最快要等到下場對李斯特城先復出。雖然今晚廠仔冇咗呢位主力射手，但好在傷愈復出嘅奧斯爾同禾確特狀態理想，前鋒基奧特腳風又順，加埋狀態弗到漏嘅辛迪卡索拉，火力依然強勁。況且阿仙奴同熱刺呢對北倫敦宿敵每次對賽都踢到飛沙劈石，佢哋目前分別排喺聯賽榜第5同第6位，大家為爭歐聯入場券必定爭崩頭。

事實上，熱刺近期戰績理想，近6仗4勝1和1負，贏唔到嗰2場都只係盃賽，心態因素大過狀態。熱刺家陣只落後「兵工廠」2分，只要今晚贏波就可以壓過宿敵進佔第5位。況且哈利卡尼同基斯甸艾歷臣近期腳風勁順，後者喺近2戰省入3粒，而啱啱同球隊續約5年半嘅哈利卡尼，今季更已斬獲20球，真係勁到冇朋友呀！兩隊射手如雲，今晚一定攜手做「大」騷，捧入球大就最好不過啦！
Data King：熱刺英超主場6戰不敗

‧阿仙奴近9場英超有8場攻入最少兩球。

‧熱刺近6戰英超主場保持不敗，取得4勝2和。

‧阿仙奴近6場英超勝仗全部「半贏全贏」。
盤路解碼

禾確特近6次英超披甲鬥熱刺，為阿仙奴貢獻4個入球及3次助攻。