馬體會角球戰術 正中皇馬死穴

猪拉多纳

從奪取歐聯次數、Fans數目以至陣中球星嘅受歡迎程度嚟睇，皇馬毫無疑問係全球最具影響力嘅球會，但最諷刺嘅係，皇馬喺西班牙受歡迎程度反而不及國外，當地嗰種「反皇馬」情意結好大程度源於歷史因素。

20世紀初球會成立未夠20年，就獲國王阿方素十三世賜封「皇家」（Real）兩字，「艦隊」自此便與當時不受人民歡迎嘅波旁王朝政府扯上關係。及至西班牙內戰期間，皇馬名宿巴拿貝時任球隊教練，加入西班牙國民軍右翼集團，企喺獨裁者佛朗哥嘅一方。其後佛朗哥長達40年嘅獨裁統治，亦係名宿巴拿貝升任球會主席時期，皇馬與佛朗哥獨裁政府嘅關係就更為密切，5、60年代皇馬成績騰飛，更有唔少國民認為係獨裁政權喺背後間接扶助。
沙冶奧拉莫斯倦勤最致命

當唔少西班牙人視皇馬等同建制、政府嘅球隊，同時亦代表國家恥辱嘅同時，馬體會就相對代表住草根嘅一群。「床單兵團」從來較少以貴價球星作招徠，以極具經濟效益嘅組軍方式喺西甲立足。近年喺施蒙尼執教下，整體打法更趨體力化，憑住極具紀律性嘅防守，配合熟練、快速反擊，成為一支全歐「人見人怕」嘅勁旅，好似國王盃兩對皇馬及巴塞便曾3次喺開波一分鐘內入波，今季5鬥皇馬更取得2勝3和未嘗一敗優勢。馬體會今季角球處理亦有明顯進步，目前喺西甲已有15個角球入波，正好針對皇馬防守死球嘅弱點，尤其係沙冶奧拉莫斯倦勤，「艦隊」後防更令人擔心。

至於皇馬要克制對手，應該要集中力量攻擊馬體會左後防，呢個位置係佢哋全防線最弱，「銀河艦隊」能否捉住其死穴痛擊，就要睇睇近期被批評獨食嘅加里夫巴利及波監刑滿嘅C朗，能否穿梭兩翼輪流夾擊。

（now632台周六晚11:00直播）