紅魔狂鋒 摧毀「黑仔幫」

猪拉多纳

喺邊度跌低就喺邊度企番起身，曼聯早排喺足總盃第4圈被劍橋聯逼和，咩面都冇晒，好彩「紅魔」知恥近乎勇，即刻喺重賽炒番呢支「乙組仔」晉級，今晚重返英超戰線造訪黑仔到爆嘅韋斯咸，尹佩斯、法卡奧、朗尼齊齊披甲，「錘仔幫」條防線邊頂得住先？捧1.78倍客勝啦！

曼聯喺足總盃16強嘅對手係英甲隊伍普雷斯頓，領隊尹戈爾牙擦到叫大家快啲買曼聯捧盃，睇得出佢老人家對自己班波勁有信心。
曼聯近13戰僅輸1仗

咁又難怪嘅，「紅魔」近13場聯賽只係輸過1場，戰績同狀態已經重返正軌，朗尼墮後踢攻擊中場愈嚟愈似樣，就連尹佩斯同法卡奧都搵番射門鞋，配合翼鋒迪馬利亞提供彈藥，韋斯咸點頂呀？

Yennie之所以睇小韋斯咸，皆因呢支倫敦球隊近排真係好黑，冬季轉會窗閂閘前足足有8單交易告吹，領隊艾拿戴斯自爆想借個守將都借唔切，愁到爆！冇計，「黑仔幫」條防線真係好殘，一對大將雲斯頓列特同占士哥連斯齊齊打柴，搞到「大Sam」要搵中場高耶迪客串中堅，夥拍啱啱克服背傷嘅湯堅斯鎮守中路，聽落都戥佢哋擔心。
8單交易撻Q 韋斯咸防線勁殘

仲有，韋斯咸上輪聯賽淨吞利物浦兩蛋不特止，前鋒安祖卡路爾仲打埋柴，主力射手迪亞法沙高亦因違規上陣隨時受罰，今仗出唔出得都未知，要靠雪到硬晒嘅卡頓高爾衝鋒陷陣，攻不銳時守不穩，聽見都唔開胃！咁嘅環境，梗係捧曼聯啦！
盤路解碼

兩軍近12次英超交手，曼聯獲11勝1和。
Data King 朗尼係錘仔幫剋星

‧韋斯咸近10戰英超主場取得7勝2和1負。

‧曼聯近20場英超作客倫敦球會僅1敗，餘19戰為12勝7和。

‧曼聯射手朗尼近9次喺英超披甲鬥韋斯咸勁入10球。