拜仁留力歐聯細啖漢堡

猪拉多纳

(六)9 拜仁慕尼黑 Vs 漢堡

德甲傳統南北打吡，到今日實力無疑已經好懸殊，不過拜仁歇冬後狀態只係循序漸進，進攻主力列貝利養傷令球隊組織入楔能力大不如前，上仗贏包尾史特加都要旨意洛賓同阿拉巴兩個世界波，球隊下周中要作客烏克蘭踢歐聯淘汰賽首回合，關係重大，今仗即使列貝利傷愈亦恐留力周中再搏，唔會去得太盡。

漢堡近期兩連勝，雖然過程有啲勉強，經驗有限嘅教頭辛巴亞喺進攻方面做得唔叻，但防守同紀律總算大有進步，上仗對漢諾威上半場場面受壓，半場休息立即壯士斷臂，收起名氣大老將雲達華治同韋斯達文，換入掃蕩力強嘅積拉錫同小將艾殊頓葛斯加強防守，終得保勝果，今仗續有進攻主力拉蘇加同賀治比缺陣，作客安聯球場當然擺大巴死守，大細中位數3.5球吼細盤。

（有線61及201台周六晚10時30分直播）