C朗氹皇馬迷 誓演入球科騷

猪拉多纳

皇家馬德里喺上個禮拜嘅打吡戰，作客慘被馬德里體育會大炒0:4，就連蛋都破唔到，真係乜面都冇晒！好在「銀河艦隊」今晚返到主場出擊，對手只係實力麻麻嘅拉科魯尼亞，相信佢哋喺主場Fans面前一定唔會留手，就算讓到兩球，都照捧1.58倍「讓球主勝」！

（now632台周日凌晨1:00直播）
皮里茲要錢唔要人

雖然喺「馬德里打吡」潰敗，但係C朗拿度一於少理，照樣開生日Party大玩特玩，咁做法除咗令到皇馬會長皮里茲親自落訓練場照肺之外，仲激到班「艦迷」紮紮跳，拉隊去訓練場舉起「你開心，就係我哋嘅羞恥！」嘅橫額，到咗尋日仲有西班牙傳媒爆料，話皮里茲認為30歲嘅C朗將走下坡，只要有球隊出得起好價錢，皇馬會樂意放走呢位葡萄牙球王，事關佢効力呢幾年，皇馬响佢身上已經賺番晒轉會費條數喎！老實講，以球王C朗嘅堅毅唔衰得性格，點會唔用入波去氹番粉絲，同埋畀啲顏色畀皮里茲睇先！

係，皇馬近期主力傷兵的確唔少，占士洛迪古斯、比比、沙治奧拉莫斯等等都唔踢得，不過前線火力一啲都冇受影響，「三叉戟」C朗、賓施馬同加里夫巴利全部候命，唔使驚冇波入噃。
拉科例牌遇強即屈

拉科暫時排喺聯賽榜第11位，近3場錄得2勝1和，睇落狀態唔錯，弊在佢哋對住強隊都冇啖好食，上月中淨吞巴塞隆拿4蛋都未算羞家，首循環主場更大敗畀皇馬2:8，問你死未？拉科今場造訪成肚火嘅「銀河艦隊」，仲撞正中堅柏保路恩素亞儲夠黃牌要坐波監，呢90分鐘睇怕都難捱，真係輸少當贏算數罷啦！
盤路解碼

皇馬今季西甲10次主場出擊，當中8戰開出半場W。
乜都玩錦囊：中位數3.5球照博大

「銀河艦隊」西甲主場戰績驕人，近8場全勝豪取30球，除開每場平均攻入對手3.75球，今場「皇馬三叉戟」C朗拿度、賓施馬同加里夫巴利繼續擔正數胡，就算大細中位數調整為3.5球，都照捧1.59倍入球大！