利華 狼堡食慣「大」茶飯

猪拉多纳

今日係情人節，不過德甲利華古遜同禾夫斯堡肯定唔會好似情人糖黐豆咁囉，因為兩隊都搶分要緊呀！利華要爭取下屆歐聯資格不容有失，而排第2、近期氣勢如虹嘅狼堡就有「人氣王」奇雲迪布尼率領「三叉戟」係咁入波，梗係唔畀佢停啦。由於雙方都有強大火力，今場玩1.72倍入球大冇走雞！

（有線64及203、中央5台周六晚10:30直播）
奇雲迪布尼弗到爆

狼堡歇冬後氣勢強勁，轉會窗臨完結前簽入德國世界盃冠軍功臣舒賀爾尼，陣容如虎添翼。有留意開德甲嘅球迷，都應該記得呢個聯賽多年嚟出產過唔少「鐵三角」，遠嘅有巴拉哥夫、波碧同艾爾巴，近期啲就有2009年冠軍組合米斯莫域、迪斯高同加菲迪，不約而同嚟自史特加。依家德國媒體就封奇雲迪布尼、舒賀爾尼同巴斯杜斯係新一代「『狼堡』三叉戟」嘞。比利時國腳奇雲迪布尼扭得、交得、又射得，唔單止係德甲助攻王，歇冬後3場聯賽更轟入5球，荷蘭箭頭巴斯杜斯亦有3球進帳，只要舒賀爾尼快快手融入埋，呢隊波絕對唔講得笑！

另邊廂嘅利華上場意外輸咗畀雲達不來梅後，跌落至第6位，為咗張歐聯入場券就要快啲追番入前4，好在射手傑斯寧狀態唔錯，加埋南韓前鋒孫興民，入球能力唔使懷疑。

睇番兩隊近年對賽，原來好多時都出現大量入球。上季兩次交手，每次都係主隊贏3:1。今季首循環喺禾夫斯堡，佢哋就以4:1「大」破利華。既然兩隊都咁有鬥心去進攻，今場入波又點會少？
頂占筍盤：利華古遜（入球大）

跟庄走