英甲仔沒有牙擦的資格

猪拉多纳

呢幾日英格蘭足總盃16強烽煙四起，不過Peter首先想講周二凌晨嗰場獨腳戲，就係英甲四哥普雷斯頓主場對曼聯，因為呢場波提醒大家，無論任何比賽或運動，都要保持謙虛同識得尊重對手。話說普雷斯頓嘅37歲老將、曾為保頓於英超征戰多年嘅箭頭奇雲戴維斯，最近轟入職業生涯第150粒士哥，賽前佢大言不慚話曼聯今季有好多弱點，絕對唔怕佢哋喎。

所謂人貴自知，普雷斯頓唔單止低曼聯兩級，實力相差幾條街，只要紅魔唔輕敵就應可晉級。作為教練，Peter有時會將對手睇唔起自己球隊嘅說話，貼喺更衣室壁報板上，筆者唔使多費唇舌，球員自然會受到激勵大打爭氣波。正所謂驕兵必敗，何況普雷斯頓只係英甲阿四，邊有資格咁牙擦呢？因此紅魔晉級機會高唱入雲。

講番今晚英足盃，阿仙奴主場迎戰英冠榜首米杜士堡，由於英超冠軍已屬車路士同曼城嘅「雙藍」之爭格局，歐聯亦只能見步行步，因此英足盃成為阿仙奴捧盃嘅最大希望，加上佢哋係上屆盟主，當然想二連冠，因此領隊雲格會派出較佳人腳應戰，相信可力克米堡順利過關。
金句：

賽前把口唔收，賽後難辭其咎。