紅魔唔對辦普雷斯頓博偷雞

猪拉多纳

英足盃16強壓軸戲碼，由奪冠大熱嘅曼聯作客甲組仔普雷斯頓，「紅魔鬼」近期表現畀人插到暈，攻勢冇組織，淨係靠「燒味戰術」，變咗隊「長傳隊」，連領隊尹戈爾都承認仲未搵到乜嘢陣式最啱曼聯。嘩！咁搞法，以前嗰支踢出流暢攻勢嘅紅魔幾時先返嚟先？近3場全勝嘅普雷斯頓今場唔係冇得鍊，一於搏吓2.87倍嘅讓球主勝！

（now 621及633周二凌晨3時45分直播）
排陣失當錯置朗尼

「戰術大師」尹戈爾近期自拆招牌，唔係亂排陣搵前鋒朗尼踢防中，就係瘋狂「斬料」，勁多長傳，上場英超對般尼贏得有運兼肉酸，魔粉睇到眼火爆，咁嘅曼聯真係唔掂，而且今場仲要有菲爾鍾斯、尹佩斯同戴利白蘭特呢3大主力因傷上陣成疑，加埋卡域克繼續養傷，睇嚟朗尼都要繼續客串踢防中嘞！

都係嗰句喇，英足盃一向係爆冷溫床，英乙劍橋聯都和到曼聯0比0，英甲嘅普雷斯頓點解唔得先？佢哋經過一月嘅小低潮後，近排成功反彈，連贏3場，防守又唔太曳，要守住進攻單調、作客表現不穩嘅紅魔唔係難事喎，受讓博得過！